ەرەجە بويىنشا، شەنگەن ۆيزاسىن بەرۋ تۋرالى شەشىمدى ەو-عا مۇشە مەملەكەتتىڭ ءتيىستى كونسۋلدىعى 15 كۇن ىشىندە قابىلدايدى. بۇل ەرەجە قازاقستانعا دا قاتىستى قولدانىلاتىن بولادى.
"ەرەكشە، جەكە جاعدايلاردا، ەگەر ءوتىنىشتى ەگجەي-تەگجەيلى تەكسەرۋ جانە/نەمەسە قوسىمشا قۇجاتتاردى ۇسىنۋ قاجەت بولسا، بۇل مەرزىم 45 كۇنگە دەيىن ۇزارتىلۋى مۇمكىن. بۇل تاجىريبە تەك ەرەكشە جاعدايلاردا عانا ۇلتىنا قاراماستان بارلىق ءوتىنىش بەرۋشىلەرگە بۇرىنان بەرى قولدانىلىپ كەلەدى",- دەپ حابارلادى قازاقستانداعى ەو وكىلدىگى.
قازاقستان ءۇشىن جاقىندا ەنگىزىلگەن قوسىمشا كونسۋلتاتسيالار وتكىزۋ ءراسىمى جەتى كۇنگە دەيىن سوزىلۋى مۇمكىن جانە بۇل كونسۋلتاتسيالار ستاندارتتى 15 كۇندىك ءراسىم اياسىندا جۇرگىزىلەدى. سوندىقتان ءوتىنىش بەرۋشىلەردىڭ ۆيزا الۋ ۋاقىتى ايتارلىقتاي ۇزارمايدى.
"قوسىمشا كونسۋلتاتسيالار – بىرقاتار ەلدەرگە قولدانىلاتىن جانە ۆيزا كودەكسىمەن رەتتەلەتىن ستاندارتتى ءراسىم. شەنگەن ايماعىنا مۇشە مەملەكەتتەر ءبىر-بىرىمەن كەڭەسۋ ءۇشىن جۇيەلى تۇردە پايدالانىپ وتىراتىن شەنگەن اقپاراتتىق جۇيەسىندە (SIS) «قارا تىزىمدەر» جوق",- دەلىنگەن حابارلامادا.
"ادىرنا" ۇلتتىق پورتالى