جاھاندانۋ زامانىندا قازاقتىڭ وتباسىلىق قۇندىلىقتارىن ساقتاۋى وتە ماڭىزدى. الايدا سوڭعى جىلدارى وتباسى قۇندىلىعىنا ءجۇردىم-باردىم قارايتىن بولدىق. ال بۇل ماسەلەنى شەشۋدىڭ جولى بار ما؟
رەسپۋبليكالىق «قارا شاڭىراق» قوعامدىق بىرلەستىگىنىڭ ءتورايىمى تۇرار ساتتارقىزىنىڭ ايتۋىنشا، بۇگىنگى تاڭدا شىعىپ جاتقان پروبلەمانىڭ ءبارى وتباسىنداعى تاريبەدەن شىعىپ جاتىر. ال وسى ءبىر وتباسى قۇندىلىعىنىڭ السىرەگەنىنەن كەيىن قارتتار قاراۋسىز قالىپ جاتقان كورىنەدى.
«مىسالى ەلىمىزدە جىلدان جىلعا قارتتار ءۇيى كوبەيىپ كەلە جاتىر. مەملەكەتىك قارتتار ۇيىنەن بولەك، جەكە مەنشىك قىزمەت كورسەتەتىن ۇيىمدار دا پايدا بولا باستادى. مۇنىڭ ءبارى اينالىپ كەلگەندە ۇلتتىق قۇندىلىقارىمىزدىڭ كەرى كەتىپ بارا جاتقانىنان دەپ بىلەمىن. نەگىزى مەملەكەت تاراپىنان جاس ۇرپاقتىڭ تاربيەسىنە نازار اۋداراتىن كەز كەلىپ جەتتى. ال ءبىز مىسقىلداپ كىرگەن اۋرۋ جازىلىپ كەتەتىن سەكىلدى كورىپ وتىرمىز. الايدا ۇلتتىق تاربيەگە ءمان بەرمەسەك، وتباسى قۇندىلىعىن تۇسىنەتىن جاستاردىڭ سانى ازايا بەرەدى. ەلىمىزدە وتباسى قۇندىلىعىن قالىپتاستىرۋمەن اينالىساتىن ءار ءتۇرلى ۇيىمدار مەن كەڭەستەر جۇمىس ىستەيدى. وكىنىشكە قاراي ولاردىڭ جۇمىسى كوزگە كورىنىپ جاتقان جوق. ءتۇرلى ءىس-شارالار وتەدى. بىراق وندا زەينەپ احمەتوۆا، ورازكۇل اسانعازى، ساۋلە مەشىتبايقىزى سەكىلدى انالارىمىزدى شاقىرىپ، ولاردىڭ عيبراتتى اڭگىمەلەرىن تىڭداۋعا بولادى عوي»، – دەيدى بىرلەستىك جەتەكشىسى.
تۇرار ساتتارقىزى وتباسى قۇندىلىعىنا وتباسى، وشاق قاسىنداعى ماسەلە دەپ قاراۋعا بولمايتىنىن ايتادى. ناقتىراق ايتساق ول وتباسى قۇندىلىعىنا مەملەكەتتىك دەڭگەيدە ءمان بەرەتىن كەز كەلدى دەگەن پىكىردە.
«جۋىردا مەملەكەت باسشىسى قاسىم-جومارت توقاەۆ اقساقالدار القاسىن قۇرۋ كەرەك دەپ باستاما كوتەردى. بۇل شىن مانىندە وتە كەرەمەت باستاما. ويتكەنى قازىرگى زاماندا اقساقالدارىمىزدىڭ قادىرى كەتىپ قالدى. اشىعىن ايتساق قازىنامىز سانالاتىن قارتتارىمىزدى ءتيىستى دەڭگەيدە قادىرلەي الماي ءجۇرمىز. مەنىڭ ويىمشا، اقساقالدار القاسى جانە اجەلەر القاسى سەكىلدى ۇيىمدار پرەزيدەنتتىڭ جانىنان قۇرىلۋى كەرەك. الايدا اقساقالدار القاسىنا دەپۋتاتتىققا ۇمتىلىپ جاتقان ادامداردى تارتۋدىڭ قاجەتى جوق. ەل اراسىندا ءالى دە بولسا، ءوزىنىڭ قاسيەتىن ساقتاعان اقساقالدارىمىز بار. مىنە وسى اقساقالداردىڭ باسىن بىرىكتىرىپ، قازاقتىڭ ۇلتتىق سالت-ءدۇستۇرى مەن قۇندىلىعىن دارىپتەۋگە بولادى. اقساقالدار القاسى قۇرىلىپ، ۇلتتىق باعىتتا جۇمىس ىستەگەن جاعدايدا عانا ءبىز ءوز بالالارىمىزدى وتانشىل ەتىپ تاربيەلەي الامىز»، – دەيدى ول.
