دارا دارىنداردى بيىك قويعان شەت ەل

1796
Adyrna.kz Telegram

 مەملەكەتىمىز جىل سايىن ەڭبەك نارىعىنا قاجەتتى ماماندار دايارلاۋ ءۇشىن ارنايى گرانتتار بولەتىنى بەلگىلى. تەستىلەۋدەن ءتاۋىر ۇپاي العان تالاپكەرلەر وزدەرىنە ۇناعان ماماندىقتى تاڭداپ، ءبىرشاما مۇمكىندىكتەرگە يە بولادى.  بىراق ەلىمىزدىڭ جوعارى وقۋ ورىندارىندا ءبىلىم نارىمەن سۋسىنداۋدى  پريوريتەت قىپ  قويىپ، ماحابباتپەن تاڭدايتىن دارىندى بالالاردىڭ قاتارى جىلدان-جىلعا سيرەۋدە. اقش،  وڭتۇستىك كورەيا، گەرمانيا، فرانتسيا، يسپانيا، شۆەتسيا، يزرايل، چەحيا تاعىسىن تاعى بار. ءدال وسى ەلدەردە جاس دانىشپاندارىمىز مامان اتانىپ، بولاشاققا بيلەت الادى.

ەرەكشە قابىلەت، نۇرلى اقىل، تولاسسىز ەڭبەك، ۇشقىر شابىت، تۋما تالانت – بۇل قاسيەتتەردى بايقاعان اتا-انالار بالالارىن «VIP» ستاتۋسىنداعى مەكتەپتەرگە بەرۋگە اسىعادى. نازارباەۆ ينتەللەكتۋالدىق مەكتەبى، قازاق تۇرىك ليتسەيى، رەسپۋبليكالىق فيزيكا-ماتەماتيكا مەكتەبى، رەسپۋبليكالىق «دارىن» مەكتەبى، تىزبەكتەي بەرسەك كوپ. بۇل وردالاردا جەتكىنشەكتەر وي ورىستەرىن كەڭەيتىپ، دامۋعا تولىقتاي بەت بۇرادى. الەم ەلدەرى ۇيىمداستىرعان بايقاۋلارعا بارىپ، جەڭىس تۋىن جەلبىرەتىپ، قانجىعانى بايلاپ كەلەتىندەرى تاعى بار. ەل كورەدى، جەر كورەدى، قىزىعۋشىلىق ويانادى. الدىنا ماقسات قويىپ، وعان جەتەدى دە. بۇگىندە 11 سىنىپتا وقيتىن كتل-دىك اليشەر،  انگليادا ورنالاسقان «ەكسەتەر» ۋنيۆەرسيتەتىنە جولداما الدى. نيش-تىك ءانۋار «ستەنفوردتىڭ»    2-ءشى كۋرس ستۋدەنتى. دارىندىق اليحان «كەمبريدجگە» توقتام قويدى، ەندى مىنە، ول 3-ءشى كۋرستا.  ءبىر قىزىعى، ەشقايسىسى قازاقستانعا ورالۋدى جوسپارلامايدى. قاناتىن قاتايتىپ، ۇيادان ۇشىرىپ جىبەردىك، بارسا كەلمەسكە كەتە باردى. ساڭلاقتاردىڭ ورنىن تولتىرۋ ءۇشىن، امەريكالىق ميستەرلەر مەن قىتايلىق اجداھالاردى الدىرۋعا تۋرا كەلەدى، ماسەلە قايدا جاتىر؟

قۇرعاق ايتقاندا، IQ دەڭگەيى جوعارى ميلى جاستاردىڭ شەتكە كەتۋى ۇيرەنشىكتى جاعدايعا اينالدى. سولتۇستىك قازاقستان وبلىستىق ءبىلىم باسقارماسىنىڭ مالىمەتىنە قاراساق، 2011 جىلى 5428 وقۋشى مەكتەپ بىتىرگەن، سونىڭ 472-ءسى رەسەيدىڭ ۋنيۆەرسيتەتتەرىنە تۇسكەن، ال 2012 جىلى 656 تۇلەك وزگە ەلدەرگە اتتانعان. 2013 جىلى ۇبت-عا قاتىسپاۋشىلاردىڭ قوپتىگىنە قاراپ، كورشى مەملەكەتكە كەتكەندەر از بولماعانىن بولجاۋعا بولادى. وزا شاپقان ۇزدىكتەرگە، تۇرىكتەر دە اۋىز سالدى.

پاتريوتتىق سەزىمدەرى ويانىپ، تۋ تىگەمىن دەپ كەلگەندەر، جالاقىنىڭ سوماسىنا قاناعاتتانباعاندىقتان با، كەلگەن جولمەن قايتادى .

تۋعان جەردىڭ توپىراعىن ءسۇيىپ، كوركەيتەمىن دەگەن ۇشقىر ءۇمىت قۇمعا اينالىپ بىرتە-بىرتە سەيىلەدى. قانشاما اقشا جۇمساپ وقىتقان ماماندى قاي مەملەكەت كەرى جىبەرە قويار دەيسىز. وقۋدى تامامداعاننان كەيىن، بەلگىلى ءبىر ۋاقىت ارالىعىنا سول ەلدە قىزمەت ەتۋ شارتى جاسالادى. شارت مەرزىمى بىتكەنگە دەيىن وتباسىن قۇرىپ،  ورتاعا بەيىمدەلۋ پروتسەسى جۇزەگە اسادى. شارتاراپقا تاراعان ، قايدا كەتتىنىڭ اۋىلى.

ولاردى قايتارۋ قيىن. اي وتەر، جىل وتەر... احمەتتەر مەن ابايلاردى، مۇستافالاردى جوعالتقانىمىزدى سەزبەي دە قالارمىز. جاستاردىڭ مۇراتى – ءبىلىم، ال ءتالىم – تالابى. ونەر، وقۋ – جاستىقتىڭ قارۋ-جاراعى...

 

                                                                                                سايانا سەيتقوجا،

«تۇران» ۋنيۆەرسيتەرى 

جۋرناليستيكا فاكۋلتەتىنىڭ ستۋدەنتى

پىكىرلەر