Memleketımız jyl saiyn eŋbek naryǧyna qajettı mamandar daiarlau üşın arnaiy granttar böletını belgılı. Testıleuden täuır ūpai alǧan talapkerler özderıne ūnaǧan mamandyqty taŋdap, bırşama mümkındıkterge ie bolady. Bıraq elımızdıŋ joǧary oqu oryndarynda bılım närımen susyndaudy prioritet qyp qoiyp, mahabbatpen taŋdaityn daryndy balalardyŋ qatary jyldan-jylǧa sireude. AQŞ, Oŋtüstık Koreia, Germaniia, Fransiia, İspaniia, Şvesiia, İzrail, Chehiia taǧysyn taǧy bar. Däl osy elderde jas danyşpandarymyz maman atanyp, bolaşaqqa bilet alady.
Erekşe qabılet, nūrly aqyl, tolassyz eŋbek, ūşqyr şabyt, tuma talant – būl qasietterdı baiqaǧan ata-analar balalaryn «VIP» statusyndaǧy mektepterge beruge asyǧady. Nazarbaev İntellektualdyq mektebı, Qazaq Türık liseiı, Respublikalyq fizika-matematika mektebı, Respublikalyq «Daryn» mektebı, tızbektei bersek köp. Būl ordalarda jetkınşekter oi örısterın keŋeitıp, damuǧa tolyqtai bet būrady. Älem elderı ūiymdastyrǧan baiqaularǧa baryp, jeŋıs tuyn jelbıretıp, qanjyǧany bailap keletınderı taǧy bar. El köredı, jer köredı, qyzyǧuşylyq oianady. Aldyna maqsat qoiyp, oǧan jetedı de. Bügınde 11 synypta oqityn KTL-dık Alişer, Angliiada ornalasqan «Ekseter» universitetıne joldama aldy. NİŞ-tık Änuar «Stenfordtyŋ» 2-şı kurs studentı. Daryndyq Alihan «Kembridjge» toqtam qoidy, endı mıne, ol 3-şı kursta. Bır qyzyǧy, eşqaisysy Qazaqstanǧa oraludy josparlamaidy. Qanatyn qataityp, ūiadan ūşyryp jıberdık, barsa kelmeske kete bardy. Saŋlaqtardyŋ ornyn toltyru üşın, Amerikalyq misterler men Qytailyq ajdahalardy aldyruǧa tura keledı, mäsele qaida jatyr?
Qūrǧaq aitqanda, IQ deŋgeiı joǧary mily jastardyŋ şetke ketuı üirenşıktı jaǧdaiǧa ainaldy. Soltüstık Qazaqstan oblystyq bılım basqarmasynyŋ mälımetıne qarasaq, 2011 jyly 5428 oquşy mektep bıtırgen, sonyŋ 472-sı Reseidıŋ universitetterıne tüsken, al 2012 jyly 656 tülek özge elderge attanǧan. 2013 jyly ŪBT-ǧa qatyspauşylardyŋ qöptıgıne qarap, körşı memleketke ketkender az bolmaǧanyn boljauǧa bolady. Oza şapqan üzdıkterge, türıkter de auyz saldy.
Patriottyq sezımderı oianyp, tu tıgemın dep kelgender, jalaqynyŋ somasyna qanaǧattanbaǧandyqtan ba, kelgen jolmen qaitady .
Tuǧan jerdıŋ topyraǧyn süiıp, körkeitemın degen ūşqyr ümıt qūmǧa ainalyp bırte-bırte seiıledı. Qanşama aqşa jūmsap oqytqan mamandy qai memleket kerı jıbere qoiar deisız. Oqudy tämamdaǧannan keiın, belgılı bır uaqyt aralyǧyna sol elde qyzmet etu şarty jasalady. Şart merzımı bıtkenge deiın otbasyn qūryp, ortaǧa beiımdelu prosesı jüzege asady. Şartarapqa taraǧan , qaida kettınıŋ auyly.
Olardy qaitaru qiyn. Ai öter, jyl öter... Ahmetter men Abailardy, Mūstafalardy joǧaltqanymyzdy sezbei de qalarmyz. Jastardyŋ mūraty – bılım, al tälım – talaby. Öner, oqu – jastyqtyŋ qaru-jaraǧy...
Saiana SEITQOJA,
«Tūran» universiterı
Jurnalistika fakultetınıŋ studentı
