ەلى ەرلەرىن ۇلىقتادى. مەملەكەت باسشىسى قاسىم-جومارت توقاەۆتىڭ ارنايى جارلىعىمەن تۇركيادا توپىراعىندا بولعان جەر سىلكىنىسى سالدارىن جويۋعا اتتانىپ، ىزدەستىرۋ-قۇتقارۋ جۇمىستارىنا بەل شەشىپ، بىلەك سىبارا ارالاسقان قازاق ەلىنىڭ ازاماتتارى، قۇتقارۋشىلار توبى، ماراپاتتالدى، دەپ حابارلايدى "ادىرنا" ۇلتتىق پورتالى.
قازاق ەلىنىڭ قۇتقارۋشىلارى مەملەرەكتتىك ماراپاتتارعا لايىق تانىلدى. ولارعا سالتاناتتى جيىن قارساڭىندا العىس حاتتار مەن ايرىقشا وردەندەر تابىستالدى.
قۇتقارۋشىلار، مەديتسينا قىزمەتكەرلەرى، كينولوگتار مەن اۆياتسيا ماماندارى، جالپى سانى 112 ادامعا قازاقستان رەسپۋبليكاسى پرەزيدەنتىنىڭ العىسى جاريالانعان. ونىڭ ىشىندە اقمولا وبلىسىتىق تجد قۇتقارۋ ءبولىمىنىڭ باسشىسى ايدىن جولامانوۆقا ءىI دارەجەلى «ايبىن» وردەنى تابىستالدى.
- بىزگە 7 قاباتتى ۇيدە ىزدەۋ-قۇتقارۋ جۇمىستارىن جۇرگىزۋدى تاپسىردى. ول ءۇيدىڭ تۇگى قالماي قيراعان. ءتىرى قالعان جاننىڭ جوق ەكەنىن بىلدىك. ءۇيىندى استىندا شامامەن 20-دان استام ادامنىڭ دەنەسى بار دەپ بولجاندى. ءبىز 25 ءمايىتتى الىپ شىقتىق، - دەدى ازامات.
دارىگەر الماگۇل الدابەكوۆانىڭ ايتۋىنشا، دارىگەرلەر توبى دا اپاتتىق جاعدايدا قىزمەت ەتۋگە سانالى تۇردە قادام باسسا دا، پالەكەتتى ءوز كوزىمەن كورۋ وڭايعا سوقپاعانىن.
- بار شامامىزبەن كومەكتى جاسادىق. مەديتسينالىق كومەك، پسيحيكالىق، مورالدىق كومەك جاسادىق. تۇركيانىڭ ادامدارى بىزگە ريزا بولىپ، راحمەتىن ايتتى. ءوزىم ويلايمىن، جاقسى جۇمىس جاسادىق دەپ، - دەدى مامان.
توتەنشە جاعدايلار ءمينيسترىنىڭ ايتۋىنشا، قىزمەتكەرلەردىڭ جالاقىسىن ارتتىرۋ جايى دا قاراستىرىلعان. يۋري يلين:
- ۇكىمەتتىڭ قاۋلىسىنا سايكەس، بىزدە جالاقى ءوسىپ جاتىر. باسشىلىق قۇرامنىڭ ەڭبەكاقىسى تومەنگى مولشەرمەن وسەتىن بولسا، جالپى قۇرام قىزمەتكەرلەرىنىڭ جالاقىسى بىردەن 70%-عا دەيىن ۇلعايادى. قىزمەتكەر العاشقى كەزەڭدە شامامەن 110 مىڭ تەڭگە الادى. ەندى ولار 179-180 مىڭ تەڭگە كولەمىندە الادى دەپ ۇمىتتەنەمىز.
قازاقستاندىق قۇتقارۋشىلار تۇركيادا ءۇش پروۆينتسيا اۋماعىندا ىزدەستىرۋ-قۇتقارۋ جۇمىستارىن جۇرگىزدى. اتاپ ايتساق، نۋرداگى اۋدانىندا، گازيانتەپ جانە حاتاي قالالارىندا ازاماتتاردى ۇيىندىلەردەن شىعارۋعا اتسالىستى. سونىمەن بىرگە قاحرامانماراش پروۆينتسياسىنا ۇزدىكسىز گۋمانيتارلىق كومەك جەتكىزىپ وتىردى.
"ادىرنا" ۇلتتىق پورتالى
