الماتىدا حالىقارالىق ايەلدەر كۇنىنە وراي ميتينگ-كونتسەرت ءوتتى، دەپ حابارلايدى “ادىرنا” ۇلتتىق پورتالى.
«اناعا مىڭ تاعزىم» اتتى شارانىڭ تاقىرىبى جاس ۇرپاقتى دالانىڭ ءبىرتۋار ايەلدەرى ۇلگىسىندە تاربيەلەۋ بولدى.
شارا شوقان ءۋاليحانوۆ اتىنداعى الاڭدا ءوتتى. ونى «ەرىكتىلەر ليگاسى» قوعامدىق قورى مەن «قازاقستان اتا-انالار وداعى» قوعامدىق بىرلەستىگى ۇيىمداستىردى.
قازاقستان اتا-انالار وداعىنىڭ تەڭ قۇرىلتايشىسى باعيلا بالتاباەۆانىڭ ايتۋىنشا، ساياباققا 700-دەن استام ازامات جينالعان. بۇل اتا-انالار، ەرىكتىلەر، اعا بۋىن وكىلدەرى.
ساحنادان قوعام بەلسەندىلەرى، تانىمال بلوگەرلەر اتا-انالارعا، بالالارعا، جاستارعا ۇندەۋ تاستادى. سالاۋاتتى ءومىر سالتى، وقۋ، اتا-انانى قۇرمەتتەۋدىڭ ماڭىزدىلىعى تۋرالى اڭگىمەلەدى. مىسال رەتىندە تۋعان جەرىن قورعاعان دالانىڭ ۇلى ايەلدەرىنىڭ ەسىمدەرى اتالدى، ولاردىڭ اراسىندا توميريس، مانشۇك مامەتوۆا، ءاليا مولداعۇلوۆا بار. جاستاردىڭ ۇيلەسىمدى دامۋى ءۇشىن ولاردىڭ ءومىر جولىن زەردەلەۋدىڭ، جاس قازاقستاندىقتاردى وتانعا دەگەن سۇيىسپەنشىلىك رۋحىندا تاربيەلەۋدىڭ ماڭىزدىلىعى اتاپ ءوتىلدى.
باعيلا بالتاباەۆا اتاپ وتكەندەي، شارا «ەرىكتىلەر ليگاسى» مەن «قازاقستان اتا-انالار وداعىنىڭ» بىرلەسكەن مەموراندۋمى اياسىندا ۇيىمداستىرىلعان جوبالاردىڭ ءبىر بولىگى بولدى. بۇل سالاۋاتتى ءومىر سالتى، پاتريوتيزم، تاريحتى زەردەلەۋ، دالانىڭ حالىقتىق ادەت-عۇرىپتارى تاقىرىپتارىندا سەمينارلار، ترەنينگتەر. وسىنداي تاربيەلىك ءمانى بار جوبالار بارىسىندا، اسىرەسە، اتا-اناعا قۇرمەت، اعا ۇرپاققا قۇرمەت كورسەتۋدىڭ ماڭىزدىلىعى ءسوز بولادى.
شارا بارىسىندا تانىمال ونەرپازداردىڭ كونتسەرتى ءوتتى. سونداي-اق، قولونەر بۇيىمدارىنىڭ، ءداستۇرلى زەرگەرلىك بۇيىمداردىڭ كورمە-جارمەڭكەسى ۇيىمداستىرىلىپ، عاسىردان عاسىرعا جەتەر، دالا قوجايىندارى دايىنداعان ءداستۇرلى بۇيىمدار ۇسىنىلدى.
