فرانتسيا سوتى مۇحتار ابلازوۆكە سوتقا كەلمەگەنى ءۇشىن ايىپپۇل سالدى. بۇل تۋرالى بتا بانكى ءوزىنىڭ رەسمي سايتىندا حاباردار ەتتى، دەپ جازادى "ادىرنا" ۇلتتىق پورتالى.
"2023 جىلعى 7 ناۋرىزدا فرانتسيانىڭ ەكس-ان-پروۆانس قالاسىنىڭ اپەللياتسيالىق سوتى مۇحتار ابليازوۆقا سوتقا كەلمەگەنى ءۇشىن ايىپپۇل تاعايىنداۋ تۋرالى شەشىم شىعاردى. سوت ءابليازوۆتىڭ ساياسي قۋدالاۋ تۋرالى دالەلدەرىن كەلمەۋدى اقتاۋ رەتىندە قابىلداۋدان باس تارتتى. مۇحتار ءابليازوۆ جاۋاپ الۋ ءۇشىن 2021 جىلدىڭ 15 جانە 16 ماۋسىمىندا ەكس-ان-پروۆانس سوتىنا كەلۋى كەرەك بولعان. الايدا سوت وتىرىسىنىڭ الدىندا ول ادۆوكاتى ارقىلى ساياسي قۋعىننان قورقاتىنىن العا تارتىپ، فرانتسۋز سوتىنىڭ نۇسقاۋىن ورىنداۋعا نيەتى جوق ەكەنىن مالىمدەگەن. كەيىنىرەك بتا ءابليازوۆتىڭ سوتقا كەلمەگەنىنە بايلانىستى وعان ايىپپۇل سالۋ تۋرالى ءوتىنىش بەردى. اپەللياتسيالىق ساتىدا سوت مۇحتار ءابليازوۆتىڭ 2018 جىلى دا وسىنداي شاقىرتۋمەن كەلگەنىن انىقتادى. سونداي-اق ول الدىمەن انگليادا، كەيىن فرانتسيادا بوسقىن مارتەبەسىنەن ايرىلعاندىقتان، بۇل مارتەبەسىن سوتقا كەلمەۋ ءۇشىن پايدالانا المادى. وعان قوسا، تەرگەۋ سۋدياسى ابليازوۆكە سوت باقىلاۋى شاراسىن تاعايىنداعان، بۇل قاتارعا سوتتىڭ ءوتىنىشى بويىنشا كەلۋ دە كىرەدى. مۇحتار ءابليازوۆ ەكس-ان-پروۆانس قالالىق سوتىنىڭ شاقىرتۋىنا كەلمەي، بۇل شارانى بۇزىپ وتىر. بتا بانكى فرانتسۋز سوتىنىڭ ءادىل شەشىمىن قۇپتايدى. مۇحتار ءابليازوۆ پەن ونىڭ سىبايلاستارى سوت پروتسەستەرىنە قاتىسۋدان بىرنەشە رەت باس تارتتى جانە كوپتەگەن سوت شەشىمدەرىن بۇزدى. سونىڭ ىشىندە اقش-تا ولار قىلمىستىق قۋدالاۋعا جانە ايىپپۇلدارعا ىلىكتى",- دەلىنگەن بانك تاراتقان مالىمدەمەدە.
"ادىرنا" ۇلتتىق پورتالى
