ورتالىق سايلاۋ كوميسسياسىنىڭ توراعاسى نۇرلان ءابدىروۆ رەسپۋبليكا پارلامەنتى ءماجىلىسى مەن ءماسليحاتتارىنا سايلاۋدى ازىرلەۋ مەن وتكىزۋ شەڭبەرىندە وڭىرلەرگە جاساعان ينسپەكتسيالىق ساپارلارىن قىزىلوردا وبلىسىندا جالعاستىردى. توراعا الدىمەن اۋماقتىق سايلاۋ كوميسسيا مۇشەلەرى مەن مەملەكەتتىك ورگان باسشىلارىمەن قاتىسۋىمەن كوپشەلى سەمينار-كەڭەس وتكىزدى.
جيىندا وبلىسى اكىمى اپپاراتىنىڭ باسشىسى، پروكۋراتۋرا، پوليتسيا دەپارتامەنتىنىڭ باسشىسى، جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى جانە اۋماقتىق سايلاۋ كوميسسياسىنىڭ توراعاسى سايلاۋشىلار ءتىزىمىن جاساقتاۋ، سايلاۋدى ۇيىمداستىرۋ، ونىڭ ىشىندە ماتەريالدىق-تەحنيكالىق قامتاماسىز ەتۋ، مۇگەدەكتىگى بار ازاماتتار ءۇشىن سايلاۋ ۋچاسكەلەرىن قولجەتىمدى ەتۋ ءۇشىن قاجەتتى شارالاردى قابىلداۋ، سايلاۋ بيۋللەتەندەردىڭ ۋچاسكەلەرگە ۋاقىتىلى جەتكىزۋ جانە باسقا دا ماڭىزدى ماسەلەلەر بويىنشا بايانداما جاسادى.
كەڭەس بارىسىندا وبلىس اكىمىنىڭ اپپارات باسشىسى شاحماردان بايمانوۆ وڭىردە 486 002 ازامات سايلاۋشىلار تىزىمىنە ەنگىزىلگەنىن، سايلاۋشىلار ءۇشىن saylau.orda.gov.kz ونلاين پلاتفورماسى ىسكە قوسىلعانىن اتاپ ءوتتى. سونىمەن بىرگە كانديداتتاردىڭ ۇگىت ناسيحات قۇرالدارىن ورنالاستىرۋ ءۇشىن وبلىس بويىنشا 466 ورىن، ۇگىتتىك-باسپا ماتەريالدارىنا 268 ورىن جانە سايلاۋشىلارمەن كەزدەسۋگە 169 ورىن بەلگىلەنگەنىن تىلگە تيەك ەتتى.
«ءوزىڭدى سايلاۋشىلار تىزىمىنەن تەكسەر» سەرۆيسى مەن saylau.orda.gov.kz پلاتفورماسى جۇمىس ىستەيدى. سەرۆيستە ءاربىر ازامات جەكە سايكەستەندىرۋ نومەرىن (جسن) ەنگىزە وتىرىپ، تىركەلگەن سايلاۋ ۋچاسكەسى تۋرالى مالىمەتتى جانە سول سايلاۋ ۋچاسكەسىنىڭ قاي مەكەن-جايدا ورنالاسقانىن كارتادان ونلاين كورە الادى. ياعني اۋماقتىق، وكرۋگتىك جانە ۋچاسكەلىك سايلاۋ كوميسسيالارى جانە تىركەلگەن كانديداتتار تۋرالى اقپارات ەنگىزىلدى.
سايلاۋشىلار ءۇشىن telegram-بوت (sailau_kzoBot) جانە «Smart Qyzylorda» ءموبيلدى قوسىمشاسى جۇمىس ىستەيدى. وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى عابيت جاڭاباەۆ مۇگەدەكتىگى بار ازاماتتار ءۇشىن بارلىق جاعدايلار جاسالعانىن جانە سايلاۋ كۇنى ولاردى تاسىمالداۋعا 34 ينۆاتاكسي قىزمەت كورسەتىپ، داۋىس بەرۋ كۇنى وبلىس بويىنشا 42 ونلاين سۋردواۋدارماشى جۇمىس جاسايتىنىن اتاپ ءوتتى.
قىزىلوردا وبلىسىنىڭ اۋماقتىق سايلاۋ كوميسسياسىنىڭ توراعاسى ادىلبەك ەرسۇلتانوۆتىڭ ايتۋىنشا، ايماقتا 516 سايلاۋ كوميسسياسى جۇمىس جاسايدى. وعان بارلىعى 3382 كوميسسيا مۇشەسى تارتىلعان.
قىزىلوردا وبلىسى بويىنشا بىرمانداتتىق اۋماقتىق سايلاۋ وكرۋگتەرى بويىنشا 522 كانديدات تىركەلدى. تالاپقا ساي ەمەس 5 ازاماتتىڭ، پارتيالىق تىزىمنەن ءوز ءوتىنىشى نەگىزىندە 1 ادامنىڭ كانديداتتىعى الىندى. قازىرگى تاڭدا 516 كانديدات تىركەۋدەن ءوتتى. ونىڭ ىشىندە: قر پارلامەنتى ماجىلىسىنە 10 كانديدات، وبلىستىق ماسليحاتقا 49 كانديدات، قالالىق ماسليحاتتارعا 81 كانديدات، اۋداندىق ماسليحاتتارعا 311 كانديدات تىركەلگەن.
وبلىستىق ماسليحاتقا پارتيالىق ءتىزىم بويىنشا 6 پارتيادان 65 كانديدات تىركەلدى. جيىندا ادىلبەك ەرسۇلتانوۆ ورتاشا العاندا ءبىر مانداتقا 3,3 ادام تىركەلگەنىن اتاپ ءوتتى. ەڭ ۇلكەن باسەكەلەستىك 6 وكرۋگتە قىزىلوردا قالاسى مەن ارال، جاڭاقورعان اۋداندارىندا 5 ادامنان كەلەدى.
تىركەلگەن كانديداتتاردىڭ ىشىندە 433-ءى ەر، 83-ءى ايەل ادام. ەڭ جاس كانديدات 21 جاستا، ەڭ ەرەسەگى 66 جاستا. مۇنان كەيىن توراعا اۋماقتىق جانە ۋچاسكەلىك سايلاۋ كوميسسيا مۇشەلەرىنە ارنالعان پراكتيكالىق سەمينارداعى ىسكەرلىك ويىندى كوردى.
ىسكەرلىك ويىندا ايماقتاعى ىرگەلى وقۋ ورنى قورقىت اتا اتىنداعى ۋنيۆەرسيتەتىنىڭ قۇقىقتانۋ ماماندىعىندا وقيتىن ستۋدەنتتەر سايلاۋ پروتسەسىنىڭ ەرەكشەلىكتەرى، داۋىس بەرۋ ءتارتىبى تۋرالى پراكتيكالىق ويىندار كورسەتتى. بۇل ءوز كەزەگىندە جاستاردىڭ سايلاۋدا داۋىس بەرۋ مادەنيەتىن قالىپتاستىرۋعا جول اشادى.
"ادىرنا" ۇلتتىق پورتالى
