23-24 قازان كۇندەرى «رەسپۋبليكا كۇنى» ۇلتتىق مەرەكەسى جانە قىزىلوردا قالاسىنىڭ استانا بولعانىنا 100 جىل تولۋ مەرەيتويىنا وراي شۆەيتساريانىڭ جەنەۆا، بەرن قالالارىندا سىر ونەرپازدارىنىڭ كونتسەرتى ءوتتى.
كونتسەرتكە شۆەيتسارياداعى شەتەلدىك ەلشىلىكتەردىڭ وكىلدەرى، جەنەۆا جانە بەرن قالالارىنداعى قازاق دياسپوراسى مەن جەرگىلىكتى تۇرعىندار قاتىستى.
كونتسەرتتىڭ ماقساتى – قازاق مادەنيەتىن، ۇلتتىق ونەردى، سىر ءوڭىرىنىڭ جىراۋلىق ءداستۇرىن الەمگە تانىتۋ. وعان ۇلتتىق مۋزىكانىڭ جاۋھارلارىن تورتكۇل دۇنيەگە پاش ەتكەن حالىق اسپاپتار، سىر وڭىرىنەن شىققان رەسپۋبليكاعا تانىمال مادەنيەت مايتالماندارى م.نيازوۆ، ءۇ.مەدەۋوۆا، ا.شاعداتوۆ، م.ماقۇلبەكوۆ، ءا.قۋاڭباەۆ، ت.وتەنوۆا، ب.ورىنباسار، م.امانجولوۆ، ا.شاداەۆ، ا.ماحامبەتجان، ا.ءابدى، ا.تورەعالي جانە م.جانتورە، ا.شۇكىروۆ، ج.جۇمابەك، ج.قايىپبەرگەن، ن.رۇستەمۇلى، ز.نىسانباەۆ، ت.اياپوۆا قاتىسىپ، ونەر كورسەتتى.
گاسترولدىك ساپار اياسىندا كورەرمەنگە كونتسەرتتىك باعدارلامامەن قاتار، قازاقتىڭ ۇلتتىق تاعامدارى، ۇلتتىق ناقىشتا جاسالعان سىي-سياپات ۇسىنىلدى.
جۇرتشىلىق تانىم مەن تاعىلىمعا تولى كەش سىيلاعانى ءۇشىن سىربويىلىق ونەرپازدارعا العىس ءبىلدىردى.
ايتا كەتۋ قاجەت، وسى جىلى ناۋرىز مەرەكەسىنىڭ تاريحي جانە مادەني ماڭىزىن ءتۇسىندىرۋ، الەم جۇرتشىلىعىنا تانىستىرۋ ماقساتىندا يسپانيا، فينليانديا، ەستونيا مەملەكەتتەرىندە سىر ونەرپازدارىنىڭ كونتسەرتى وتكەن بولاتىن.
