قازاقستاندىق ءانشى Sadraddin ماڭعىستاۋ وبلىسىندا اسكەري قىزمەتشىلەردىڭ قازا بولۋىنا بايلانىستى الماتىداعى كونتسەرتتەرىن كەيىنگە قالدىردى، دەپ حابارلايدى "ادىرنا".
بۇل تۋرالى ونەر يەسى الەۋمەتتىك جەلىدەگى ۆيدەوۇندەۋىندە ايتتى.
بۇعان دەيىن ءانشىنىڭ الماتى قالاسىنداعى ورتالىق ستاديوندا كونتسەرتتەرى 26 جانە 27 قىركۇيەككە جوسپارلانعان بولاتىن. ەندى كونتسەرتتەر ءبىر كۇنگە شەگەرىلدى.
وسىعان سايكەس، 26 قىركۇيەكتەگى كونتسەرت 27 قىركۇيەككە، ال 27 قىركۇيەكتەگى كونتسەرت 28 قىركۇيەككە اۋىستىرىلدى.
ءانشى ماڭعىستاۋ وبلىسىنداعى قايعىلى وقيعا سالدارىنان قازا تاپقان اسكەري قىزمەتشىلەردىڭ وتباسى مەن جاقىندارىنا كوڭىل ايتتى.
«وسىنداي اۋىر ساتتە قازا تاپقانداردىڭ وتباسىلارىنا قۇرمەت ءبىلدىرىپ، حالقىممەن بىرگە بولۋدى ماڭىزدى دەپ سانايمىن»، – دەدى Sadraddin.
سونداي-اق ءانشى قازا تاپقان اسكەري قىزمەتشىلەردىڭ وتباسىلارىنا قارجىلاي كومەك كورسەتۋدى جوسپارلاپ وتىرعانىن جەتكىزدى.
Sadraddin كونتسەرتتەردى ۇيىمداستىرۋعا ۇلكەن شىعارماشىلىق توپ پەن سەرىكتەستەردىڭ بىرنەشە اي بويى دايىندالعانىن اتاپ ءوتىپ، كونتسەرت كۇندەرىنىڭ اۋىسۋىنا تۇسىنىستىكپەن قاراعان كورەرمەندەر مەن ۇيىمداستىرۋشىلارعا العىس ءبىلدىردى.
