65 جاستاعى ەستەر ۋلمان — شۆەيتساريا تۇرعىنى. قازىرگى تاڭدا ول قازاق ءتىلىن ۇيرەنىپ ءجۇر. TikTok جەلىسىندە تانىمال بولىپ ۇلگەرگەن ايەل «ادىرنا» تىلشىسىنە ءتىل مەڭگەرۋگە دەگەن قىزعۋشىلىعى نەدەن باستالعانىن ايتىپ بەردى.
«بارلىعى دا ديماش قۇدايبەرگەننىڭ ونەرىن تاماشالاعاننان كەيىن باستالدى. ونىڭ شىعارماشىلىعىمەن America’s Got Talent بايقاۋى كەزىندە تانىستىم. ونەرى مەنى تاڭعالدىردى. وسىلايشا ءارتىستىڭ تالانتىنا باس يگەن ميلليونداعان جانكۇيەرىنىڭ بىرىنە اينالعان جايىم بار. كەيىن اندەرىنىڭ نە تۋرالى ەكەنىن ۇعىنىپ، ۇلتىنىڭ مادەنيەتىمەن جاقىنىراق تانىسۋ ءۇشىن قازاق ءتىلىن ۇيرەنۋگە بەل بۋدىم. شىنى كەرەك، مەنىڭ جاسىمدا جاڭا ءتىلدى مەڭگەرۋ وڭاي ەمەس. دەسە دە، بارىنشا تىرىسىپ ءجۇرمىن. باقىتىما وراي، ونلاين كۋرس تاۋىپ، جازىلىپ الدىم. قازىرگى تاڭدا قازاق تىلىنەن ساباق بەرەتىن مۇعالىمىم دە بار»، - دەيدى ول.
شۆەيتساريالىق ايەل قازاقتاردىڭ قوناقجاي حالىق ەكەنىن ەرەكشە اتاپ ءوتتى.
«مەن قازاقستاندا 2 مارتە بولدىم. العاش رەت 2022 جىلدىڭ قىركۇيەگىندە ديماشتىڭ الماتىدا وتكەن كونتسەرتىنە كەلگەن ەدىم. وتانداستارىڭىز مەنى وتە جىلى، زور قۇرمەتپەن قارسى الدى. بۇنداي ىستىق ءىلتيپاتتى كۇتپەدىم. ەكىنشى رەت، مىنە، بيىل سىزدەرمەن بىرگە ناۋرىز مەرەكەسىن اتاپ ءوتتىم. اتموسفەرا ەرەكشە بولدى. وسى ساپارىمدا كوپتەگەن قازاقستاندىقپەن تانىستىم. ولارمەن بىرگە الماتىنىڭ ادەمى جەرلەرىن ارالاپ، كوجەدەن ءدام ءتاتتىم.
مەنى دۇرىس تانىمايتىن جاندارعا دەيىن ۇيلەرىنە نە مەيرامحانالارعا شاقىرىپ، داستارحاندارىنان ءدام تاتتىردى. ۇيىمە قايتاردا سىيلىق تولى باگاجبەن كەتتىم عوي. بۇنىڭ بارلىعى دا ەشقاشان ۇمىتىلمايتىن، تاڭعاجايىپ ەستەلىكتەر!»-دەيدى ەستەر ۋلمان.
اڭگىمە بارىسىندا ول قازاقستانعا تاعى دا كەلگىسى كەلەتىنىن جەتكىزدى.
“الداعى ۋاقىتتا باسقا دا وبلىستار مەن قالالاردى ارالاعىم كەلەدى. ول كەزدە بۇدان دا كوپ ەموتسيا الاتىنىما سەنىمدىمىن. بارشاڭىزدى قازاق ءتىلىن ۇيرەنۋگە شاقىرامىن. قازاق ءتىلى — وتە ادەمى ءتىل»،- دەيدى شۆەيتساريالىق ايەل.
ديانا اسان
"ادىرنا" ۇلتتىق پورتالى
