ءماجىلىس دەپۋتاتتىعىنا ءوزىن-ءوزى ۇسىنعان تاۋەلسىز كانديدات باقىتجان بازاربەك ءباسپاسوز ءماسليحاتىندا "وسى سايلاۋدا كوشباسشى" ەكەنىن ايتىپ، قورىتىندى ناتيجەدەن تەك قانا جەڭىس كۇتەتىنىن مالىمدەدى، دەپ جازادى "ادىرنا" ۇلتتىق پورتالى.
"ارينە، 30 جىل بويى جينالعان ماسەلەنى ءاپ-ساتتە شەشۋ قيىن. بىراق ءبىز وسى سايلاۋعا وپپونەنتتەرىمىزگە قاراعاندا ۇلكەن دايىندىقپەن شىقتىق. ءبىز ەلگە، حالىققا اتقارىلعان ۇلكەن ءىستىڭ قورىتىندىسىمەن كەلدىك. مەملەكەتتىك مەنشىككە قايتارىلعان قانشاما جەرلەر بار. قانشاما اۋىلدىڭ جايىلىمدى جەرلەرىن قايتاردىق. ءبارىن سوتتىڭ شەشىمىمەن دالەلدەپ وتىرمىز. سوندىقتان دا ءبىز ۇگىت-ناسيحات پەن سايلاۋالدى باعدارلامامىزدى ازىرلەۋ جۇمىسىنا تولىعىمەن دايىندىقپەن كەلدىك. باقىلاۋشىلارىم ۇسىنعان اقپاراتقا سايكەس، الدىن-الا ناتيجە بويىنشا ءبىز وسى سايلاۋدا كوشباسشىمىز. ازىرگە ءبىز قورىتىندى دەرەكتەردى العان جوقپىز. وسىنداي ۇلكەن دايىندىقپەن كەلگەن كەزدە ءبىزدىڭ كۇتەتىنىمىز تەك قانا جەڭىس! باسقا ەشقانداي ناتيجەنى كۇتپەيمىز. سەبەبى، مەن باسقا وپپونەنتتەرگە قاراعاندا ءوزىمدى سوزبەن ەمەس ىسپەن دالەلدەپ، حالىققا كورسەتە ءبىلدىم", - دەپ مالىمدەدى باقىتجان بازاربەك.
"ادىرنا" ۇلتتىق پورتالى
