ەرمۇرات باپي: ماعان سەنىم ارتقان حالىقتان باسقا ەشكىمنىڭ الدىندا جاۋاپ بەرۋگە مىندەتتى ەمەسپىن!

9853
Adyrna.kz Telegram

"ماعان سەنىم ارتقان حالىقتان باسقا ەشكىمنىڭ الدىندا جاۋاپ بەرۋگە مىندەتتى ەمەسپىن!". بۇل پىكىردى ءماجىلىس دەپۋتاتى بولىپ سايلانعان بەلگىلى جۋرناليست ەرمۇرات باپي Abai.kz رەداكتسياسىنا بەرگەن سۇحباتىندا ايتتى، دەپ جازادى "ادىرنا" ۇلتتىق پورتالى. 

- سونىمەن، ەرمۇرات اعا، قازاقستان پارلامەنتىنە دەپۋتاتتىعىڭىز قۇتتى بولسىن! ەندى نە ىستەيسىز؟

- راقمەت!.. ەندى نە ىستەيمىز؟ ارينە جۇمىس ىستەيمىز! بۇعان دەيىنگى ساياسي كوزقاراسپەن، بۇرىنعى ازاماتتىق ۇستانىممەن، حالىقتىق-قوعامدىق بەتالىستان تايماي جۇمىس ىستەيمىز. مەنىڭ الدىمدا بۇدان باسقا جول جوق. كەرى بۇرىلۋعا – قالىپتاسقان قاسيەتىم، تاربيەم دەيىن بە، استە كونبەيتىنىن بىلەم. ونىڭ ۇستىنە، جاڭا جول ىزدەيتىن ۋاقىتتان ءوتىپ كەتتىم...

29 سايلاۋ وكرۋگى بويىنشا ءوزىن-ءوزى ۇمىتكەرلىككە ۇسىنىپ، كەشە عانا تاۋەلسىز دەپۋتات بولىپ سايلانعان ارىپتەستەرىمە «حالىق بلوگى» فراكتسياسىن قۇرۋ جونىندە فەيسبۋك پاراقشامدا ۇندەۋ جاريالادىم. ءبىز – ەگەر 29 دەپۋتاتتىڭ تاۋەلسىز ەكەنى راس بولسا، حالىقتىڭ مۇڭ-مۇقتاج ماسەلەسىنە ساي جۇمىس ىستەۋىمىز كەرەك.

- «بۇرىنعى باعىتتا» دەيسىز... ونىڭىز ءسىزدىڭ وپپوزيتسيالىق باعىتىڭىز ەمەس پە، سولاي عوي؟ ەندەشە، وعان بيلىك مۇمكىندىك بەرەدى دەپ ويلايسىز با؟

- بىرىنشىدەن، مەنىڭ قالاي جۇمىس ىستەيتىنىمدى بيلىك شەشپەيدى. ماعان ماندات بەرگەن بيلىك ەمەس – حالىق، مەنىڭ سايلاۋشىلارىم. سوندىقتان، بيلىكتەن رۇقسات سۇرايتىن قۇلقىم دا، قاقىم دا جوق. مەن ءوزىمنىڭ سايلاۋشىلارىمنىڭ الدىندا عانا ەسەپ بەرەم!

ەكىنشىدەن، بۇگىنگى ساياسي جاعدايدا بيلىكتىڭ قوعاممەن، وپپوزيتسيامەن مامىلەلى جۇمىس ىستەۋگە، اشىق بولماسا دا، بۇيرەگىنىڭ استىندا تەرەڭ جاتقان ىقىلاسى بار دەپ ويلايمىن. ەندىگى تەكە-تىرەستەن تۇك شىقپايتىنىن بيلىكتىڭ تۇسىنەتىن كەزى كەلدى. بۇل تۇسىنىك قوعامنىڭ دا ساناسىنا ءسىڭۋى كەرەك شىعار... تاي-تالاسپەن «جاڭا قازاقستان» قۇرىلمايدى. ونى بيلىك تەك قانا قوعامنىڭ تىكەلەي جانە قويان-قولتىق ارالاسۋىمەن عانا قۇرا الادى. ايتپەسە، توقاەۆ مىرزانىڭ «جاڭا قازاقستان» يدەياسى دالباسا دەكلاراتسيا بولىپ قالادى. مەنىڭ ويىمشا، بيلىك وسىنى ءتۇسىنىپ وتىر.

ۇشىنشىدەن، شىنىمدى ايتسام، ماعان سەنىم ارتقان حالىقتىڭ الدىنداعى جاڭا جاۋاپكەرشىلىكتىڭ سالماعىنان قورقامىن. بۇرىن بيلىكپەن الىسىپ جۇرگەندە، مەندە مۇنداي سەزىم بولماعان. ال ەندى حالىقتىڭ سەنىمىن ارقالاۋ جاۋاپكەرشىلىگى – مەن ءۇشىن تىپتەن باسقا سەزىم بولىپ تۇر...

- ەرمۇرات اعا، بيلىك «ءتۇسىنىپ وتىرسا»، مىناۋ سايلاۋدى نەگە قاراقۇرىقتاتىپ جىبەردى، نەگە حالىق قولداعان تاۋەلسىز كانديداتتاردى وتكىزبەي تاستادى؟

- راس ايتاسىڭ، نۇرگەلدى! بۇل جاعداي قوعامدى قوپارىپ تاستايتىنداي دۇربەلەڭگە اينالىپ كەتتى. سايلاۋ ۋچاسكەلەرى ۇزاق ۋاقىتقا سوزباي، حاتتامانى باقىلاۋشىلارعا دەر ۋاقىتىندا بەرگەندە، ءدال وسىنداي داۋ-داماي تۋار ما ەدى؟ بارلىق ىرىڭ-جىرىڭ وسىدان شىعىپ تۇر عوي. ياعني، بيلىك داۋىس بەرۋ پروتسەسسىن باقىلاۋدا ۇستاپ تۇرعىسى كەلدى، بىراق ستسەناري بۇزىلىپ بارا جاتقانىنان سەكەم الىپ، نازارباەۆتىق «قولمەن باسقارۋعا» كوشتى. بىراق ونىڭ ءوزىن وگىز سوقامەن جەر جىرتقانداي ەتتى.

ەگەر بارلىق ۇمىتكەرگە پروتوكولدار دەر ۋاقىتىندا بەرىلگەندە، ءدال وسىنداي دابىرا تۋماس ەدى. بالكىم، ونداي جاعدايدا بۇگىن نارازىلىق تانىتىپ جۇرگەن ارىپتەستەرىمنىڭ ءبىرازى شۋ كوتەرمەس پە ەدى، كىم ءبىلسىن؟ سايلاۋ ىسىنە ەبدەيسىز ارالاسۋمەن بيلىك ءبارىن بىلىقتىردى. گاپ وسىندا جاتىر دەپ ويلايمىن.

مەن ەندى «سۋدان ءوتىپ العان سوڭ»، اناۋ-مىناۋ دەپ، «وزەننىڭ ارعى بەتىندە قالعان» ارىپتەستەرىمە نە دەيىن؟ سوتتان دا ءۇمىت بولماسىن بۇرىننان بىلەمىز. ونىڭ ۇستىنە، ءوزىنىڭ وتپەي قالعان كانديداتتارىن قولداپ، نارازىلىق الاڭىنا جينالعان حالىقتى دا كورىپ تۇرعان جوقپىن. «پاتوۆايا سيتۋاتسيا»!

- ايتسە دە، ءسىزدىڭ ءبىر باقتالاسىڭىز ينگا يمانباي ار-وجدانىڭىزعا تيەردەي ءبىراز ءسوز ايتىپ جاتىر، وعان دا جاۋاپ بەرمەدىڭىز...

- مەن وعان نە دەيمىن؟ تاپ-تازا يستەريكا! قازاق ايتادى «جەڭىلگەن ادامنىڭ ءسوزى قۇرىسىن» دەپ. ينگانىڭ جالاۋلاتىپ جۇرگەنى – ءوزى جەڭىسكە جەتكەن 5-6 ۋچاسكەدەن الىنعان پروتوكول. ال مەنىڭ قولىمدا باقىلاۋشىلارىم مەن سەنىمدى وكىلدەرىم ساعات تاڭعى بەسكە دەيىن ۋچاسكەلەردەن العان، ءبىرازى «ءتىرى» ءمور باسىلعان، كوپشىلىگى – فوتوكوشىرمە، 60 پروتوكول بار. بۇل ءبىزدىڭ وكرۋگتەگى 184 ۋچاسكەنىڭ ۇشتەن بىرىنەن الىنعان قۇجات.

«دات»-تىڭ وسى بەيسەنبى كۇنى شىعاتىن سانىنا سول 60 قاتتامانى تەگىستەي باسىپ شىعارامىز. ادىلەتتى سالىستارمالى تۇردە ايتۋ ءۇشىن، مەن گازەتتىڭ تەڭ جارتىسىن وسى پروتوكولداردى باسۋعا ارنادىم. ايتپاقشى، ينگا يمانباي جەڭگەن ۋچاسكەلەردىڭ دە حاتتاماسىن دا جاريالايمىز. اقيقات ءۇشىن ايانۋعا بولمايدى. ينتەرنەتتىڭ ۆيرتال الەمىندە ەمەس، گازەت بەتىنە باسىلىپ، ارحيۆتەردە قالسىن.

مەنىڭ سايلاۋداعى جەڭىسىمە كۇمانى بار ادام بولسا، سول حاتتامالاردى سالىستىرىپ، وزىنە توقەتەر تۇجىرىم جاساپ الادى دەگەن ويدامىن.

- دەگەنمەن، ءسىز ايتقانداي «يستەريكامەن» ينتەرنەتتى شۋلاتىپ جاتقان ينگاعا ءبىر جاۋاپ بەرۋىڭىز كەرەك ەدى عوي؟..

- نۇرگەلدى، مەن وزىمە سەنىم ارتقان حالىقتان باسقا ەشكىمنىڭ الدىندا جاۋاپ بەرۋگە مىندەتتى ەمەسپىن! مەنىڭ 25 جىلدىق «دات»-ىم مەن ءۇشىن جاۋاپ بەرەدى.

- ەرەكە، دەگەنمەن كەشە عانا جانبولات مامايمەن ءبىر وپپوزيتسيالىق مايداندا بىرگە جۇرگەن ەدىڭىز، ونى قولداپ-قورعاپ، «دات»-تىڭ ءار سانىنا دەرلىك جاريالانىم جاسادىڭىز. كەزىندە جانبولاتتى جسدپ-عا توراعا ەتەمىن دەپ، سيەزگە الىپ بارعان جەرىڭىزدە پارتيالىق توڭكەرىسكە تاپ بولىپ ەدىڭىز. ال ەندى ونىڭ ءوز كەلىنشەگىنە كەراۋىز ءسوز ايتۋىنا تىيىم جاساماعانىن قالاي ءتۇسىندىڭىز؟

- بۇل ەندى جالعىز جانبولاتتىڭ عانا پروبلەماسى ەمەس دەپ ويلايمىن. دەمپارتيادا داناگوي «اياتوللا حومەيني» بولىپ وتىرعان تولەگەن جۇكەەۆتىڭ «تەك!» دەۋگە ءجونى بار ەدى عوي! ياعني، يمانسىز «يستەريكاعا» ونىڭ دا ۇلەسى بار دەگەن ءسوز!

ونىڭ ۇستىنە، جانبولات پەن ينگا ەكەۋىنىڭ ارتىندا مەنى ءوزىنىڭ جاۋى سانايتىن بەرگەي رىسقاليەۆ تۇر. جاڭاوزەننىڭ جانايقايىنا قاتىسى بار ەكس-اكىم پارتيانى عانا ەمەس، جانبولاتتىڭ وتباسىن، بالالارىنىڭ «تاموس» مەكتەبىندەگى جىلدىق اقىسى ميلليونداعان تەڭگەلىك وقۋىن قارجىلاندىراتىن بەرگەي «مۋزىكاعا زاكاز بەرۋگە» قاقىم بار دەپ ويلايتىن شىعار. بىراق بۇل ەندى باسقا تاقىرىپتىڭ اڭگىمەسى. مەن ازىرگە ونداي اڭگىمەنىڭ دەڭگەيىنە تۇسە المايمىن.

نۇرگەلدى ءابدىعانيۇلى

Abai.kz

پىكىرلەر