جاستارعا جالدامالى پاتەر بەرگەن كەزدە، ونىڭ جۇمىسى، وتباسىلىق جاعدايى، "پروپيسكاسى", بالالارىنىڭ بار-جوعى ەسكەرىلەدى.
استانا، 18 اقپان – Sputnik. قوعامدىق دامۋ ءمينيسترى دارحان قالەتاەۆ جاستارعا ارنالعان جالعا بەرىلەتىن تۇرعىن ءۇيدى كىمدەر الا الاتىنىن ايتتى، دەپ حابارلايدى Sputnik قازاقستان تىلشىسى.
ءمينيستردىڭ ايتۋىنشا، ميلليون حالقى بار استانا، الماتى جانە شىمكەنت قالالارىندا جاستار ءۇشىن جىلىنا 1 مىڭ پاتەر سالىنادى. باسپانا جاستارعا جالعا الۋ تارتىبىمەن بەرىلمەك. جالدامالى پاتەرگە ۇمىتكەر بولا الاتىن جاستاردىڭ ساناتى وسى اپتادا قۇزىرلى ورگاندارمەن كەلىسىلمەك.
"بىزدە بالدىق جۇيە قاراستىرىلعان. پاتەر ءۇش جىل مەرزىمگە بەرىلەدى، وسىدان كەيىن ارنايى كوميسسيا كەلىسىمشارتتى ۇزارتۋ جايىن قاراستىرادى. بۇل باعدارلاما بويىنشا جاس وتباسى پاتەر العان كەزدە تۇرعىن ءۇي بانكىندە بىردەن ەسەپشوت اشۋى ءتيىس", - دەدى قالەتاەۆ ماجىلىستەگى ۇكىمەت ساعاتىندا.
سونىمەن قاتار، جالدامالى پاتەرگە اتالعان قالالاردا كەمىندە 3 جىل تۇرعان جانە 29 جاسقا دەيىنگى جاستار ۇمىتكەر بولا الادى. بۇعان قوسا، جاستار مىندەتتى تۇردە زاڭدى جۇمىس ىستەۋى كەرەك. پاتەر بەرگەن كەزدە، ازاماتتىڭ وتباسىلىق جاعدايى، بالالارىنىڭ بار-جوعى دا ەسكەرىلەدى. ءاربىر كورسەتكىشكە بالل بەرىلەدى.
يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن-ءۇي كوممۋنالدىق شارۋاشىلىعى ىستەرى كوميتەتىنىڭ توراعاسى مارحابات جايىمبەتوۆتىڭ مالىمەتىنشە، استانا مەن الماتىدا 350, ال شىمكەنتتە 300 پاتەر سالىنادى.
ولاردىڭ ءبىر شارشى مەترى 180 مىڭ تەڭگە، پاتەر اۋماعى 40 شارشى مەتر بولماق. قازىرگى تاڭدا ءۇش قالانىڭ اكىمدىكتەرىمەن جوبا پىسىقتالىپ جاتىر، دەپ سەندىردى جايىمبەتوۆ.
