Jastarǵa jaldamaly páter bergen kezde, onyń jumysy, otbasylyq jaǵdaıy, "propıskasy", balalarynyń bar-joǵy eskeriledi.
ASTANA, 18 aqpan – Sputnik. Qoǵamdyq damý mınıstri Darhan Qaletaev jastarǵa arnalǵan jalǵa beriletin turǵyn úıdi kimder ala alatynyn aıtty, dep habarlaıdy Sputnik Qazaqstan tilshisi.
Mınıstrdiń aıtýynsha, mıllıon halqy bar Astana, Almaty jáne Shymkent qalalarynda jastar úshin jylyna 1 myń páter salynady. Baspana jastarǵa jalǵa alý tártibimen berilmek. Jaldamaly páterge úmitker bola alatyn jastardyń sanaty osy aptada quzyrly organdarmen kelisilmek.
"Bizde baldyq júıe qarastyrylǵan. Páter úsh jyl merzimge beriledi, osydan keıin arnaıy komıssııa kelisimshartty uzartý jaıyn qarastyrady. Bul baǵdarlama boıynsha jas otbasy páter alǵan kezde turǵyn úı bankinde birden esepshot ashýy tıis", - dedi Qaletaev májilistegi úkimet saǵatynda.
Sonymen qatar, jaldamaly páterge atalǵan qalalarda keminde 3 jyl turǵan jáne 29 jasqa deıingi jastar úmitker bola alady. Buǵan qosa, jastar mindetti túrde zańdy jumys isteýi kerek. Páter bergen kezde, azamattyń otbasylyq jaǵdaıy, balalarynyń bar-joǵy da eskeriledi. Árbir kórsetkishke ball beriledi.
Indýstrııa jáne ınfraqurylymdyq damý mınıstrligi qurylys jáne turǵyn-úı kommýnaldyq sharýashylyǵy isteri komıtetiniń tóraǵasy Marhabat Jaıymbetovtiń málimetinshe, Astana men Almatyda 350, al Shymkentte 300 páter salynady.
Olardyń bir sharshy metri 180 myń teńge, páter aýmaǵy 40 sharshy metr bolmaq. Qazirgi tańda úsh qalanyń ákimdikterimen joba pysyqtalyp jatyr, dep sendirdi Jaıymbetov.
