الەۋمەتتىك جەلىدە رەسمي جيىندا ايتىلعان ءانۇراننىڭ ۆيدەوسى تاراپ، قولدانۋشىلار اراسىندا تالقى تۋدىردى دەپ جازادى "ادىرنا". وعان سەبەپ - نۇربەك بەكباۋدىڭ بولىسكەن بەينەجازباسى.
ونىڭ ايتۋىنشا بيلىك عيماراتىندا شىرقالعان انۇرانعا ەلدىڭ ءبارى تىكەسىنەن تىك تۇرىپ قۇرمەت كورسەتكەنىندە، "ۆلاست" ينتەرنەت جۋرنالىنىڭ ءتىلشىسى تامارا ۆاال مەن جۋرناليست يرينا سەۆوستيانوۆا ءتىپتى ورنىنان تۇرماعان كورىنەدى.
ء"انۇران شىرقالىپ، جۇرتتىڭ ءبارى تىك تۇرعاندا، تامارا ۆاال، يرينا سەۆوستيانوۆا نەگە بىلشيىپ وتىرسىزدار؟ باسقا ەمەس، پارلامەنت عيماراتىندا تۇرىپ، ءانۇرانىڭدى مەنسىنبەۋ نە دەگەن سوراقىلىق؟ گيمندى مويىنداماۋ — مەملەكەتتىلىگىڭدى مويىنداماۋ عوي. وعاش وقيعانى دارحان قىدىرالى مىرزا نازارعا الۋىڭىزدى سۇرايمىز" دەپ جازدى ول.
اتالعان جايتقا قاتىستى "ادىرنا" رەداكتسياسى زاڭگەر ماماننىڭ پىكىرىن سۇراپ ءبىلدى. زاڭگەر قۋات اۋعانبەكتىڭ ايتۋىنشا بۇل زاڭمەن قاراستىرىلۋى ءتيىس دەيدى:
"قر مەملەكەتتىك رامىزدەر تۋرالى زاڭىنىڭ 9-بابى مەملەكەتتىك گيمنىن ورىنداۋ تارتىبىنە سايكەس، مەملەكەتتىك گيمن كوپشىلىك الدىندا ورىندالعان كەزدە قاتىسۋشىلار ونى ورنىنان تۇرىپ ايتادى (تىڭدايدى), بۇل رەتتە قازاقستان رەسپۋبليكاسىنىڭ ازاماتتارى وڭ قولىن جۇرەك تۇسىنا قويادى. اتالعان وقيعا ۇلكەن تالقىعا تۇسكەن بولسا زاڭ جۇزىندە قارالۋى ءتيىس. ەگەر دە ادەيى قۇرمەتسىزدىك كورسەتىلگەن بولسا نەمەسە قانداي دا زاڭعا قايشى نارسەلەر انىقتالعان بولسا زاڭ بۇزۋشى 200 اەك (690 000 تەڭگە) ايىپپۇل تولەۋگە مىندەتتى. الايدا، ۆيدەودا ورنىنان تۇرماعان ازاماتشالار قىزمەت بابىمەن مەملەكەتتىك ماڭىزى بار شۇعىل جۇمىستار اتقارىپ وتىرعان بولسا جازا تاعايىندالماۋى دا مۇمكىن. زاڭ بارلىق جاعىنان قاراستىرىلادى" دەدى ول.
"ادىرنا" ۇلتتىق پورتالى
