Áleýmettik jelide resmı jıynda aıtylǵan ánurannyń vıdeosy tarap, qoldanýshylar arasynda talqy týdyrdy dep jazady "Adyrna". Oǵan sebep - Nurbek Bekbaýdyń bólisken beınejazbasy.
Onyń aıtýynsha bılik ǵımaratynda shyrqalǵan ánuranǵa eldiń bári tikesinen tik turyp qurmet kórsetkeninde, "Vlast" ınternet jýrnalynyń tilshisi Tamara Vaal men jýrnalıst Irına Sevostıanova tipti ornynan turmaǵan kórinedi.
"Ánuran shyrqalyp, jurttyń bári tik turǵanda, Tamara Vaal, Irına Sevostıanova nege bylshıyp otyrsyzdar? Basqa emes, Parlament ǵımaratynda turyp, ánuranyńdy mensinbeý ne degen soraqylyq? Gımndi moıyndamaý — memlekettiligińdi moıyndamaý ǵoı. Oǵash oqıǵany Darhan Qydyráli myrza nazarǵa alýyńyzdy suraımyz" dep jazdy ol.
Atalǵan jaıtqa qatysty "Adyrna" redakııasy zańger mamannyń pikirin surap bildi. Zańger Qýat Aýǵanbektiń aıtýynsha bul Zańmen qarastyrylýy tıis deıdi:
"QR Memlekettik rámizder týraly zańynyń 9-baby Memlekettik Gımnin oryndaý tártibine sáıkes, Memlekettik Gımn kópshilik aldynda oryndalǵan kezde qatysýshylar ony ornynan turyp aıtady (tyńdaıdy), bul rette Qazaqstan Respýblıkasynyń azamattary oń qolyn júrek tusyna qoıady. Atalǵan oqıǵa úlken talqyǵa túsken bolsa Zań júzinde qaralýy tıis. Eger de ádeıi qurmetsizdik kórsetilgen bolsa nemese qandaı da zańǵa qaıshy nárseler anyqtalǵan bolsa zań buzýshy 200 AEK (690 000 teńge) aıyppul tóleýge mindetti. Alaıda, vıdeoda ornynan turmaǵan azamatshalar qyzmet babymen memlekettik mańyzy bar shuǵyl jumystar atqaryp otyrǵan bolsa jaza taǵaıyndalmaýy da múmkin. Zań barlyq jaǵynan qarastyrylady" dedi ol.
"Adyrna" ulttyq portaly
