شىمكەنتتەگى ناۋرىز مەرەكەسىنە ارنالعان ءىس-شارالار بۇگىن استانا الاڭىندا وتكەن «شىرقا، ناۋرىز» گالا كونتسەرتىنە ۇلاستى.
حالىقتىڭ سۇيىكتىسىنە اينالعان ساحنا ساڭلاقتارى - جانبولات مەن جازيرا، مەلدىر اۋەلبەكوۆا، ءاليا ابىكەن مەن قانات ۇمبەتوۆ، رايم مەن ەركە ەسماحان باستاعان ەسترادا جۇلدىزدارى ءان شىرقاپ، قالا تۇرعىندارى مەن قوناقتارىنا ەرەكشە كوڭىل كۇي سىيلادى.
ناۋرىز شاشۋى رەتىندە ۇسىنىلعان كونتسەرتتىك باعدارلامانى كورۋگە كەلگەن جۇرتشىلىقتىڭ قاراسى قالىڭ بولدى. كوكتەم لەبىن جەتكىزگەن اۋەلەگەن اندەر شەرۋىن تۇرعىندار اشىق اسپان استىندا ءۇش ساعات بويى تاماشالادى. مەرەكەلىك كەش «حابار» ارناسى ارقىلى تىكەلەي ەفيردە كورسەتىلدى.
