شۇكىر، ەلىمىز الەمدەگى IT الپاۋىتتاردىڭ كوشىنە ىلەسىپ، اۋىز تولتىرىپ ايتارلىقتاي ناتيجەگە قول جەتكىزىپ كەلەدى. سالاعا بولىنەتىن قارجى كولەمى دە ارتقان. ماسەلەن، تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى IT سالانى ىلگەرىلەتۋ ءۇشىن 2021-2023 جىلدارعا 7,5 ملرد تەڭگە قاراجات قاراستىرعان. ونىڭ 1,9 ملرد تەڭگەسى 2021 جاراتىلعان بولسا، 2022 جىلى 2,7 ملرد تەڭگە سالانى دامىتۋعا جۇمسالعان. بيىل قارجى كولەمى ەداۋىر ۇلعايىپتى – 2,9 ملرد تەڭگە. بۇل سالاعا دەگەن سەنىم مەن سۇرانىستىڭ ارتقانىنىڭ بەلگىسى بولسا كەرەك.
ستاتيستيكاعا سۇيەنسەك، جۇمىس ىزدەۋ جانە جۇمىس بەرۋ پورتالدارىندا IT سالاعا قاتىسى بار بوس جۇمىس ورىندارىنىڭ سانى 57 پايىزعا وسكەن. بۇعان نە سەبەپ؟ ارينە، بىلىكتى ماماندار تاپشىلىعى. راسىندا، كەز كەلگەن كومپانيا ۇجىمعا ساۋاتتى، IT سالانى جەتىك مەڭگەرگەن ماماندى العىسى كەلەدى. بىزدە تاپ وسى ماسەلە وزەكتى بولىپ وتىر. بىلىكتى ماماندار ەلدەگى IT سالانىڭ جالاقىسىنا كوڭىلى تولماي شەتەل اسسا، الەۋەتى جەتپەگەندەر بار جالاقىنى قاناعات تۇتۋعا ءماجبۇر. ساندار سويلەسىن، ەلىمىزدەگى IT كومپانيالار مامانعا ەڭ از دەگەندە 220 مىڭ تەڭگە جالاقى تولەۋگە دايىن. ەڭ جوعارىسى 600 مىڭ تەڭگەنىڭ توڭىرەگىندە. ودان كوبىرەك سومانى كوزىڭىز شالا بەرمەيدى. باسەكەلەستىك دەڭگەيى مۇلدە تومەن. IT كومپانيالار سۇرانىستى وزدەرىنشە تولتىرىپ الەك. بۇل رەتتە ماماندار تاپشىلىعىن دا ەسكەرگەن ءجون. بىراق سالاداعى كەمشىلىكتى مەملەكەت باسشىسى قاسىم-جومارت توقاەۆ دەر كەزىندە كورە ءبىلدى جانە 2025 جىلعا دەيىن 100 مىڭ IT مامان دايارلاۋ تۋرالى پارمەن بەردى. بۇگىندە مينيسترلىك تاپسىرمانى ورىنداۋعا كىرىسىپ كەتكەن. ونىڭ نەگىزىندە 20 باعدارلامالاۋ مەكتەبىن اشۋ جوسپارلانعان. سونداي-اق اتالعان مەكتەپتەرگە 20 مىڭ گرانت بەرۋ قاراستىرىلعان. ايتالىق، 2021-2022 جىلدارى 11 باعدارلامالاۋ مەكتەبى اشىلدى.
باسىم بولىگى الماتى، اقتاۋ، ورال جانە جەزقازعان قالالارىندا بوي كوتەرگەن. سونىمەن بىرگە شەتەلدىك IT مەكتەپتەر قازاقستاندا بولىمشەسىن اشۋعا ىقىلاس ءبىلدىرىپ وتىرعان كورىنەدى. قۇبا-قۇپ. شەت ەلدىڭ IT جۇيەسىن ۇيرەنسەك، ونىڭ نەسى ايىپ. سوندىقتان، سالادا ىنتىماقتاستىق ورناتۋعا مۇددەلى تاراپتاردىڭ بارلىعىمەن كەلىسسوز جاساپ كورگەن ءجون شىعار. جالپى، قازاقستاندا IT سالاسى اۋەلدەن مەكتەپ ءبىلىم بەرۋ باعدارلاماسىنا ەنگىزىلگەن. ول بويىنشا 3 810 بالالارعا ارنالعان ۇيىرمە قىزمەت اتقارادى. جىل سايىن 78 مىڭ وقۋشى ۇيىرمەلەرگە قاتىسادى ەكەن. مۇنىڭ ءوزى ناتيجە. 2021 جىلى سول ۇيىرمەلەردە ءتالىم العان 27 وقۋشى حالىقارالىق جۇلدەگە يە بولعان. جامان ەمەس، ءتىپتى كەرەمەت. قىسقاسى، اتقارىلىپ جاتقان شارالار وڭ ناتيجە بەرىپ كەلەدى. جوعارى وقۋ ورىندارىندا دا IT سالانى يگەرەم دەگەندەرگە جول اشىق. ءبىر عانا 2021 جىلدىڭ وزىنە اتالعان سالا بويىنشا 11 852 ستۋدەنت ءبىلىم العان. ەندىگى ماقسات – ساپالى مامان دايارلاۋ.
