IT salada mamandar köp, myqtylar az

Şükır, elımız älemdegı IT alpauyttardyŋ köşıne ılesıp, auyz toltyryp aitarlyqtai nätijege qol jetkızıp keledı. Salaǧa bölınetın qarjy kölemı de artqan. Mäselen, Sifrlyq damu, innovasiialar jäne aeroǧaryş önerkäsıbı ministrlıgı IT salany ılgerıletu üşın 2021-2023 jyldarǧa 7,5 mlrd teŋge qarajat qarastyrǧan. Onyŋ 1,9 mlrd teŋgesı 2021 jaratylǧan bolsa, 2022 jyly 2,7 mlrd teŋge salany damytuǧa jūmsalǧan. Biyl qarjy kölemı edäuır ūlǧaiypty – 2,9 mlrd teŋge. Būl salaǧa degen senım men sūranystyŋ artqanynyŋ belgısı bolsa kerek. Statistikaǧa süiensek, jūmys ızdeu jäne jūmys beru portaldarynda IT salaǧa qatysy bar bos jūmys oryndarynyŋ sany 57 paiyzǧa ösken. Būǧan ne sebep? Ärine, bılıktı mamandar tapşylyǧy. Rasynda, kez kelgen kompaniia ūjymǧa sauatty, IT salany jetık meŋgergen mamandy alǧysy keledı. Bızde tap osy mäsele özektı bolyp otyr. Bılıktı mamandar eldegı IT salanyŋ jalaqysyna köŋılı tolmai şetel assa, äleuetı jetpegender bar jalaqyny qanaǧat tūtuǧa mäjbür. Sandar söilesın, elımızdegı IT kompaniialar mamanǧa eŋ az degende 220 myŋ teŋge jalaqy töleuge daiyn. Eŋ joǧarysy 600 myŋ teŋgenıŋ töŋıregınde. Odan köbırek somany közıŋız şala bermeidı. Bäsekelestık deŋgeiı mülde tömen. IT kompaniialar sūranysty özderınşe toltyryp älek. Būl rette mamandar tapşylyǧyn da eskergen jön. Bıraq saladaǧy kemşılıktı Memleket Basşysy Qasym-Jomart Toqaev der kezınde köre bıldı jäne 2025 jylǧa deiın 100 myŋ IT maman daiarlau turaly pärmen berdı. Bügınde ministrlık tapsyrmany oryndauǧa kırısıp ketken. Onyŋ negızınde 20 baǧdarlamalau mektebın aşu josparlanǧan. Sondai-aq atalǧan mektepterge 20 myŋ grant beru qarastyrylǧan. Aitalyq, 2021-2022 jyldary 11 baǧdarlamalau mektebı aşyldy. Basym bölıgı Almaty, Aqtau, Oral jäne Jezqazǧan qalalarynda boi kötergen. Sonymen bırge şeteldık IT mektepter Qazaqstanda bölımşesın aşuǧa yqylas bıldırıp otyrǧan körınedı. Qūba-qūp. Şet eldıŋ IT jüiesın üirensek, onyŋ nesı aiyp. Sondyqtan, salada yntymaqtastyq ornatuǧa müddelı taraptardyŋ barlyǧymen kelıssöz jasap körgen jön şyǧar. Jalpy, Qazaqstanda IT salasy äuelden mektep bılım beru baǧdarlamasyna engızılgen. Ol boiynşa 3 810 balalarǧa arnalǧan üiırme qyzmet atqarady. Jyl saiyn 78 myŋ oquşy üiırmelerge qatysady eken. Mūnyŋ özı nätije. 2021 jyly sol üiırmelerde tälım alǧan 27 oquşy halyqaralyq jüldege ie bolǧan. Jaman emes, tıptı keremet. Qysqasy, atqarylyp jatqan şaralar oŋ nätije berıp keledı. Joǧary oqu oryndarynda da IT salany igerem degenderge jol aşyq. Bır ǧana 2021 jyldyŋ özıne atalǧan sala boiynşa 11 852 student bılım alǧan. Endıgı maqsat – sapaly maman daiarlau.