ءماجىلىس دەپۋتاتى اسحات ايماعامبەتوۆ مىندەتتى الەۋمەتتىك ساقتاندىرۋ جۇيەسىن قايتا قايتا قاراۋدى ۇسىندى، دەپ حابارلايدى «ادىرنا» ءتىلشىسى.
ول قوردى اي سايىن قارجىلاندىرۋدىڭ ءتيىمسىز ەكەنىن اتاپ ءوتتى. ايتۋىنشا، حالىق اۋرۋحاناعا بارىپ تەكسەرىستەن تەگىن وتەمىن دەسە، وندا ءبىر اي نەمەس ءۇش اي كۇتۋ كەرەك.
«ازاماتتار تۇراقتى جارنا تولەپ جۇرسە دە، ەگەر 3 اي تولەمەي قالسا وندا اۆتوماتتى تۇردە ءمامس-تەن شىعىپ قالادى. بۇل ماسەلەنى قايتا قاراۋ كەرەك. كەز كەلگەن 12 اي ءۇشىن جارنا اۋدارىلسا، ساقتاندىرۋشىنىڭ مارتەبەسى قالدىرىلۋ ۇسىنىلادى. حالىق قاراجات تۇسكەنىن، ونىڭ قايدا جانە قانداي ماقساتقا باعىتتالعانىن ءبىلۋى كەرەك دەپ ويلايمىن. ەلەكتروندى دەنساۋلىق پاسپورتىن كورۋگە تولىق مۇمكىندىك تە بەرىلۋى كەرەك»،—دەدى دەپۋتات.ەسكە سالا كەتەيىك، مىندەتتى الەۋمەتتىك مەديتسينالىق ساقتاندىرۋ جۇيەسى 2020 جىلعى 1 قاڭتاردا ىسكە قوسىلعان ەدى. بۇل جۇيەنى ەنگىزۋ كەزىندە مەملەكەت بىرنەشە ماقساتتى كوزدەدى. اتاپ ايتساق، مەديتسينالىق قىزمەتتەردى قارجىلاندىرۋ كولەمىن ارتتىرۋ، حالىقتىڭ شىعىنىن ازايتۋ، تەگىن بەرىلەتىن ءدارى-دارمەك تىزبەسىن كەڭەيتۋ. الايدا كوپشىلىك مەديتسينالىق ساقتاندىرۋ جۇيەسىن بىرنەشە رەت سىنعا الىپ، ءتيىمسىز ەكەنىن مالىمدەگەن بولاتىن.
