جاڭاوزەندىك ماسساجيست: «مۇناي سالاسىنداعى جۇمىستى كۇتۋدىڭ ءمانىسى جوق، مەن ادامدارعا كومەكتەسۋدى ءجون سانادىم»

2250
Adyrna.kz Telegram
https://adyrna.kz/content/uploads/2023/04/9aab0537-b148-410a-bd66-ac8e9ee66747.jpeg
ليۋدميلا باشكەنوۆا 37 جاسىندا ءومىردىڭ جاڭا ارناسىنا بەت بۇرىپ، جاڭا كاسىپتى يگەرۋگە شەشىم قابىلدايدى. ومىرلىك قيىن جاعدايعا تاپ بولعان جاندارعا كومەك كورسەتۋدى ماقسات ەتكەن ول سۇيىكتى ىسىڭمەن اينالىسۋ ەڭبەككە دەگەن ىقىلاستىڭ ارتۋىنا وڭ ىقپال ەتەتىندىگىن ايتادى، دەپ حابارلايدى قوعامدىق كوممۋنيكاتسيا ورتالىعى. ليۋدميلا باشكەنوۆا - 1-توپتاعى مۇگەدەك. تاعدىر تالكەگىنە مويىماعان ماسساجيست قيمىل-قوزعالىسى شەكتەۋلى ەكەندىگىنە قاراماستان ەرىك-جىگەرىنىڭ ارقاسىندا كۇيزەلىسكە دۋشار بولعان جاندارعا كومەك قولىن سوزىپ كەلەدى. مىقتى ايەل ءوز جۇمىسى جايلى ەرەكشە ىقىلاسپەن باياندايدى. سەبەبى، ول كەي ادامداردىڭ دەرتىنەن ايىعىپ، اياعىنان تىك تۇرۋىنا ىقپالداسىپ، جاڭا ءبىر بەلەسكە بيىكتەۋىنە سەپتەسكەن.
-قانداي جۇمىس بولسا دا، ءاردايىم شىن نيەتىممەن جاساپ، كاسىبىمدى دامىتىپ كەلەمىن. كۇيزەلىسكە ءتۇسىپ، جاعىمسىز ويعا شىرمالعان، كۇش-قۋاتى، ومىرگە دەگەن قۇشتارلىعى كەمىپ، دەل-سال كۇي كەشكەن جاندارعا كومەگىمدى ايامايمىن. ماسساج ارقىلى ىزگىلىك پەن جاقسىلىققا دەگەن قۇلشىنىستى قايتا وياتىپ، سەنىمىن بەكىتۋگە سەپتەسەمىن. كوپكە كومەگىم تيسە، مەندەگى ماقسات سول، - دەدى ليۋدميلا باشكەنوۆا.
ليۋدميلا حانىم كەي ادامدار سەكىلدى مۇناي سالاسىنان دا جۇمىس ىزدەۋدى جوسپارلاعان. الايدا كۇردەلى سالاداعى قىزمەتتى كوڭىلى قالاماعان.
-مۇناي سالاسىنداعى قىزمەت بارىنە بىردەي بۇيىرا بەرمەسى انىق. سەبەبى بۇل سالادا كاسىبي بىلىكتى ءوز ءىسىنىڭ ماماندارى عانا جۇمىس ىستەۋى ءتيىس. ىركىلىسسىز ءوندىرىستى ىسكە اسىرۋدا قۇرىشتاي بەرىك، دەنساۋلىعى مىقتى ماماندار تەر توگۋدە. سوندىقتان بارشاعا ورتاق تالاپتى ەسكەرۋ مىندەت تۇر. ال مەنىڭ جاعدايىمدا دەنساۋلىعىمنىڭ دىمكاستىگىنە بايلانىستى قوعام ومىرىنە وڭ وزگەرىستەر اكەلۋدە ناقتى مۇمكىندىگىمدى سارالادىم. سۇيىكتى ءىسىڭدى تابۋ ءۇشىن قانداي ماماندىق بىتىرگەنىڭ ماڭىزدى ەمەس. ءتىپتى، مۇمكىندىگىڭىز شەكتەۋلى بولسا دا بەلگىلى ءبىر سالانى دامىتا الاسىز. ەڭ باستىسى - قاساڭ قاعيداتتارعا بوي الدىرماي، ءوز قالاۋىڭمەن ءومىر ءسۇرۋ، - دەيدى جاڭاوزەن تۇرعىنى.
ليۋدميلا باشكەنوۆا ماسساج ىسىنە بەت بۇرماس بۇرىن، قولونەرمەن اينالىسقان. بۇلدىرشىندەرگە ارنالعان ءار الۋان كيىمدەر توقىپ، ساۋدالاعان. ەڭبەك ەتۋدەن ەش جالىقپاعان جان ماڭداي تەرمەن تاپقان نان ءتاتتى دەگەن ۇستانىمدى ۇستانادى.
پىكىرلەر