جاستار رەسۋرستىق ورتالىقتارىن دامىتۋ جونىندەگى ۇيلەستىرۋ كەڭەسىنىڭ العاش رەت كوشپەلى وتىرىسى 20-21 ءساۋىر كۇندەرى سىر ەلىندە ءوتتى. ۇيلەستىرۋ كەڭەسىنىنىڭ العاشقى كۇنى قر-نىڭ اقدم جاستار جانە وتباسى ىستەرى كوميتەتىنىڭ ۆەدومستۆوارالىق ۇيلەستىرۋ جانە وڭىرلىك ءوزارا ءىس-قيمىل باسقارماسىنىڭ باسشىسى م.ەسەكەەۆا، «جاستار» عىلىمي-زەرتتەۋ ورتالىعىنىڭ جاستار رەسۋرستىق ورتالىقتارىن ادىستەمەلىك قامتاماسىز ەتۋ باسقارماسىنىڭ جەتەكشىسى ا.ابەنوۆا جانە قازاقستاننىڭ بارلىق ايماعىنان جاستار ءىسى جونىندەگى باسقارما باسشىلارى مەن بارلىق وبلىستارداعى جاستار رەسۋرستىق ورتالىقتارىنىڭ ديرەكتورلارى بايقوڭىر قالاسىنا ساپارلاپ، بىرقاتار ماڭىزدى نىسانداردى ارالادى.
شارا بارىسىندا بايقوڭىر قالاسىنىڭ اكىمشىلىك باسشىسى ك.ب.بۋسىگين قازاقستاندىق دەلەگاتتاردى قابىلداپ، بايقوڭىر قالاسىندا مەملەكەتتىك جاستار ساياساتىنىڭ جۇزەگە اسىرىلۋ بارىسى، جاستار ورتالىقتارىنىڭ جۇمىسى جانە ۆولونتەرلىك قوزعالىس جونىندە ايتىپ ءوتتى.
بۇدان كەيىن دەلەگاتسيا «بۋدۋششەە بايكونۋرا» جاستار ورتالىعىنىڭ عيماراتىنا ەكسكۋرسيا جاساپ، ورتالىقتىڭ جاستارعا ۇسىناتىن مۇمكىندىكتەرىمەن تانىستى. بايقوڭىر قالاسىنداعى ماڭىزدى تاريحي ورىن سانالاتىن «بايقوڭىر» كوسمودرومىنا بارىپ، ونداعى مۇراجايدا ورنالاسقان تاريحي مۇرا مەن جادىگەرلەردەن مول اسەر الدى.
سونىمەن بىرگە سىر ەلىنىڭ مادەني برەندىنە اينالعان قورقىت اتا مەموريالدى كەشەنىن ارالاپ، ونداعى قۇندى ەكسپوناتتاردىڭ تاريحىمەن تانىستى.
ەكسكۋرسيا سوڭىندا ەلىمىزدىڭ ءار وڭىرىنەن كەلگەن قوناقتارعا قازاقى قوناقجايلىلىق تانىتىپ، رامازان ايىنىڭ سوڭعى كۇنىندە اۋىزاشار داستارحانى جايىلدى.
