- نۇرگۇل ەسكەندىرقىزى، ۇكىلى ىبىراي اتىنداعى اقمولا وبلىستىق فيلارمونياسى وبلىسىمىزداعى شىعارماشىلىق ۇجىمنىڭ ءبىرى ەكەنىن جاقسى بىلەمىز. شىعارماشىلىق تۇرعىدان جاڭا ىزدەنىستەرگە، تىڭ رەپەرتۋارعا بارىپ جاتقاندارىڭىزدى كورىپ، بايقاپ ءجۇرمىز. ارينە، قۋانارلىق جاعداي. بىلۋىمشە، ءساۋىر ايىنىڭ 17- 18 كۇندەرى الماتىعا گاسترولدىق ساپارمەن بارىپ كەلدىڭىزدەر، سول اسەرمەن بولىسسەڭىز؟
- ۇكىلى ىبىراي اتىنداعى اقمولا وبلىستىق فيلارمونياسى ءوزىڭىز ايتقانداي ىرگەلى شىعارماشىلىق ۇجىم. 60 جىلدان استام تاريحى بار فيلارمونيانىڭ قالىپتاسۋ، دامۋ كەزەڭدەرى بولدى. قازىر شىعارماشىلىق ۇجىم تولىسۋ، كەمەلدەنۋ شاعىندا دەر ەدىم. ءساۋىر ايىنىڭ 17-18 كۇندەرى فيلارمونيانىڭ ك. كۇمىسبەكوۆ اتىنداعى قازاق اسپاپتار وركەسترى، «گاككۋ» بي ءانسامبلى جانە جەكە ورىنداۋشىلار الماتى قالاسىندا گاسترولدىق ساپارمەن بارىپ قايتتى. وسى ساپار كوپتەن ويدا جۇرگەن شارۋالارىمىزدىڭ ءبىرى بولاتىن. بيىل قازاق وركەسترىنىڭ قۇرىلعانىنا 30 جىل تولۋىنا وراي ۇيىمداستىرىلعان گاسترولدىق ساپارىمىز جوعارى دەڭگەيدە ءوتتى دەي الامىز. «ارقانىڭ كەربەز سۇلۋ كوكشەتاۋ» اتتى كونتسەرتتىك باعدارلامامىز الماتىنىڭ تالعامپاز كورەرمەندەرىن ءتانتى ەتتى دەسەم، ارتىق ايتقاندىق بولماس...
- اتاۋى دا ايشىقتى ەكەن. كونتسەرتتىك باعدارلاما نەسىمەن قىزىقتى بولدى، قانداي ۇستانىمدى باسشىلىققا الدىڭىزدار؟
- باستى ماقساتىمىز قازاق وركەسترىنىڭ دەڭگەيىن تانىتۋ، سونداعى ۇلتتىق ونەردىڭ جاناشىرلارى مەن بىلگىرلەرىمەن جولىعىسۋ، تاجىريبە الماسۋ بولدى. ايتپاقشى، ءبىزدىڭ كونتسەرتىمىز الماتىداعى قۇرمانعازى اتىنداعى ۇلتتىق وركەستردىڭ كونتسەرت زالىندا ءوتتى. اتتاقتى وركەسترمەن شىعارماشىلىق بايلانىستا بولۋعا ءار ءبىر ۇجىم مۇددەلى دەپ ويلايمىن. سول مۇمكىندىككە قول جەتكىزدى. كونتسەرتتىك باعدارلامامىز نەگىزىندە وركەستردىڭ ورىنداۋىنداعى شىعارمالارعا، سونىڭ ىشىندە قازاقتىڭ كۇيلەرىنە قۇرىلدى. كۇي – قازاقتىڭ جانى، اسقاق رۋحى، سونبەس ءومىر ساۋلەسى. وسى ساپارىمىز كۇي اتاسى قۇرمانعازىنىڭ 205 جىلدىعىنا، اسپانداعى اققۋعا ءانىن قوسقان اقان سەرىنىڭ 180 جىلدىعىنا، قازاقتان شىققان كاسىبي كومپوزيتور مۇقان تولەباەۆتىڭ 10 جىلدىعىنا سايكەس كەلدى. ارينە، قۇرامانعازىنىڭ «تەرىسقاقپاي»، «ماشينا» سەكىلدى كۇيلەرى ورىندالدى. م. تولەباەۆتىڭ اتاقتى «ءبىرجان-سارا» وپەراسىنان ءۇزىندى كورسەتتىك. سارانىڭ رولىندە قر ەڭبەك سىڭىرگەن قايراتكەرى جەرلەسىمىز سالتانات احمەتوۆا شىرقادى.
وركەسترىمىز كەنجەبەك كۇمىسبەكوۆ اتىندا بولعاسىن جەرلەس، تانىمال كومپوزيتوردىڭ «ارمان» كۇيىن، «مەنىڭ دالام» ، اقىن ك. سالىقوۆتىڭ سوزىنە جازىلعان «اققۋىم ايدىنىڭا ورالدىڭ با» اتتى اندەرىن الا باردىق.
- كورەرمەندەردىڭ ەرەكشە كوڭىلىنەن شىققان قانداي شىعارمالار بولدى؟
- الماتىنىڭ تالعامپاز كورەرمەندەرى ءبىزدىڭ «گاككۋ» بي ءانسامبلىنىڭ ونەرىنە ەرەكشە ريزاشىلىقتارىن ءبىلدىردى. سونداعى بىلگىر ماماندار، ديريجەرلەر قازاق وركەسترىنىڭ شىعارماشىلىق جاعىنان شىڭدالعانىن، رەپەرتۋارىنىڭ بايىعانىن ايتتى. ەلىمىزدەگى وبلىستىق فيلارمونيالاردىڭ قازاق وركەسترلەرىنىڭ ورتاسىندا ويىپ الاتىن ورنىمىز بار ەكەنىن سەزىنۋ – ءبىز ءۇشىن ۇلكەن قۋانىش بولدى. بەلگىلى كومپوزيتور ەرمۇرات ۇسەنوۆپەن شىعارماشىلىق بايلانىسىمىزدىڭ ارقاسىندا ءبىزدىڭ تىكەلەي سۇرانىسىمىزبەن «كەنەسارى -اق سەمسەر» اتتى كانتاتا جازىلعان بولاتىن. سونى الماتىداعى ب. بايقاداموۆ اتىنداعى حور كاپەللاسىمەن قوسىلىپ انشىلەرىمىز س. بەكمولدين، ا. قالماعامبەتوۆا، ە. تولەۋباەۆا ورىندادى. وشپەس رۋحتى، سارقىلماس قايراتتى، مۇقالماس جىگەردى تانىتاتىن اتالمىش كانتاتا كورەرمەندەردى ءبىر جەلپىنتىپ تاستادى. رۋحىمىز بيىكتەپ قايتتىق!
- بايقاۋىمشا الماتى ساپار سىزدەرگە ەرەكشە شابىت پەن قۇلشىنىس سىيلاعان سياقتى. ونەر – تار شەڭبەردە وسپەيدى، وعان ارينە ءورىس كەرەك. مۇمكىندىك بولسا، شىعانداپ شىعىپ تۇرعان دۇرىس. الماتى اسەرىنە تاعى نە قوسار ەدىڭىز؟
- ايتپاقشى، ءبىزدىڭ شىعارماشىلىق ۇجىمنىڭ ساحنا مادەنيەتى، كىرىس-شىعىسى، جۇرگىزۋشىلەرىمىز التىناي مەن توقتاربەكتىڭ داۋىس ىرعاعىنا، ۇندەرىنە، كەلىستىرىپ وقىپ، جۇرگىزگەن ماتىندەرىنە، ءداستۇرلى انشىلەرىمىز ەلميرانىڭ، سارسەنبايدىڭ، جاناردىڭ ورىنداۋىنداعى اندەرگە ەرىكسىز قول سوعىپ، قوشامەت ءبىلدىرىپ وتىردى. قۇرمانعازى اتىنداعى ۇلتتىق كونسەرۆاتوريانىڭ بىلىكتى پروفەسسور پەداگوگتارىمەن جىلى شىرايدا كەزدەسۋىمىز، ديدارلاسىپ تاجىريبە الماسۋمىز ءبىز ءۇشىن ۇلكەن ولجا بولدى.
- ونەر بيىگىنەن كورىنە بەرۋلەرىڭىزگە تىلەكتەسپىز!
سۇقباتتاسقان ەربولات بايات،
قازاقستان جازۋشىلار وداعىنىڭ مۇشەسى، اقىن-جازۋشى
"ادىرنا" ۇلتتىق پورتالى
