- Nūrgül Eskendırqyzy, Ükılı Ybyrai atyndaǧy Aqmola oblystyq filarmoniiasy oblysymyzdaǧy şyǧarmaşylyq ūjymnyŋ bırı ekenın jaqsy bılemız. Şyǧarmaşylyq tūrǧydan jaŋa ızdenısterge, tyŋ repertuarǧa baryp jatqandaryŋyzdy körıp, baiqap jürmız. Ärine, quanarlyq jaǧdai. Bıluımşe, säuır aiynyŋ 17- 18 künderı Almatyǧa gastroldyq saparmen baryp keldıŋızder, sol äsermen bölısseŋız?
- Ükılı Ybyrai atyndaǧy Aqmola oblystyq filarmoniiasy özıŋız aitqandai ırgelı şyǧarmaşylyq ūjym. 60 jyldan astam tarihy bar filarmoniianyŋ qalyptasu, damu kezeŋderı boldy. Qazır şyǧarmaşylyq ūjym tolysu, kemeldenu şaǧynda der edım. Säuır aiynyŋ 17-18 künderı filarmoniianyŋ K. Kümısbekov atyndaǧy qazaq aspaptar orkestrı, «Gäkku» bi ansamblı jäne jeke oryndauşylar Almaty qalasynda gastroldyq saparmen baryp qaitty. Osy sapar köpten oida jürgen şarualarymyzdyŋ bırı bolatyn. Biyl qazaq orkestrınıŋ qūrylǧanyna 30 jyl toluyna orai ūiymdastyrylǧan gastroldyq saparymyz joǧary deŋgeide öttı dei alamyz. «Arqanyŋ kerbez sūlu Kökşetau» atty konserttık baǧdarlamamyz Almatynyŋ talǧampaz körermenderın täntı ettı desem, artyq aitqandyq bolmas...
- Atauy da aişyqty eken. Konserttık baǧdarlama nesımen qyzyqty boldy, qandai ūstanymdy basşylyqqa aldyŋyzdar?
- Basty maqsatymyz qazaq orkestrınıŋ deŋgeiın tanytu, sondaǧy ūlttyq önerdıŋ janaşyrlary men bılgırlerımen jolyǧysu, täjıribe almasu boldy. Aitpaqşy, bızdıŋ konsertımız Almatydaǧy Qūrmanǧazy atyndaǧy ūlttyq orkestrdıŋ konsert zalynda öttı. Attaqty orkestrmen şyǧarmaşylyq bailanysta boluǧa är bır ūjym müddelı dep oilaimyn. Sol mümkındıkke qol jetkızdı. Konserttık baǧdarlamamyz negızınde orkestrdıŋ oryndauyndaǧy şyǧarmalarǧa, sonyŋ ışınde qazaqtyŋ küilerıne qūryldy. Küi – qazaqtyŋ jany, asqaq ruhy, sönbes ömır säulesı. Osy saparymyz küi atasy Qūrmanǧazynyŋ 205 jyldyǧyna, aspandaǧy aqquǧa änın qosqan Aqan serınıŋ 180 jyldyǧyna, qazaqtan şyqqan käsıbi kompozitor Mūqan Tölebaevtyŋ 10 jyldyǧyna säikes keldı. Ärine, Qūramanǧazynyŋ «Terısqaqpai», «Maşina» sekıldı küilerı oryndaldy. M. Tölebaevtyŋ ataqty «Bırjan-Sara» operasynan üzındı körsettık. Saranyŋ rolınde QR Eŋbek sıŋırgen qairatkerı jerlesımız Saltanat Ahmetova şyrqady.
Orkestrımız Kenjebek Kümısbekov atynda bolǧasyn jerles, tanymal kompozitordyŋ «Arman» küiın, «Menıŋ dalam» , Aqyn K. Salyqovtyŋ sözıne jazylǧan «Aqquym aidynyŋa oraldyŋ ba» atty änderın ala bardyq.
- Körermenderdıŋ erekşe köŋılınen şyqqan qandai şyǧarmalar boldy?
- Almatynyŋ talǧampaz körermenderı bızdıŋ «Gäkku» bi ansamblınıŋ önerıne erekşe rizaşylyqtaryn bıldırdı. Sondaǧy bılgır mamandar, dirijerler qazaq orkestrınıŋ şyǧarmaşylyq jaǧynan şyŋdalǧanyn, repertuarynyŋ baiyǧanyn aitty. Elımızdegı oblystyq filarmoniialardyŋ qazaq orkestrlerınıŋ ortasynda oiyp alatyn ornymyz bar ekenın sezınu – bız üşın ülken quanyş boldy. Belgılı kompozitor Ermūrat Üsenovpen şyǧarmaşylyq bailanysymyzdyŋ arqasynda bızdıŋ tıkelei sūranysymyzben «Kenesary -aq semser» atty kantata jazylǧan bolatyn. Sony Almatydaǧy B. Baiqadamov atyndaǧy hor kapellasymen qosylyp änşılerımız S. Bekmoldin, A. Qalmaǧambetova, E. Töleubaeva oryndady. Öşpes ruhty, sarqylmas qairatty, mūqalmas jıgerdı tanytatyn atalmyş kantata körermenderdı bır jelpıntıp tastady. Ruhymyz biıktep qaittyq!
- Baiqauymşa Almaty sapar sızderge erekşe şabyt pen qūlşynys syilaǧan siiaqty. Öner – tar şeŋberde öspeidı, oǧan ärine örıs kerek. Mümkındık bolsa, şyǧandap şyǧyp tūrǧan dūrys. Almaty äserıne taǧy ne qosar edıŋız?
- Aitpaqşy, bızdıŋ şyǧarmaşylyq ūjymnyŋ sahna mädenietı, kırıs-şyǧysy, jürgızuşılerımız Altynai men Toqtarbektıŋ dauys yrǧaǧyna, ünderıne, kelıstırıp oqyp, jürgızgen mätınderıne, dästürlı änşılerımız Elmiranyŋ, Särsenbaidyŋ, Janardyŋ oryndauyndaǧy änderge erıksız qol soǧyp, qoşamet bıldırıp otyrdy. Qūrmanǧazy atyndaǧy ūlttyq konservatoriianyŋ bılıktı professor pedagogtarymen jyly şyraida kezdesuımız, didarlasyp täjıribe almasumyz bız üşın ülken olja boldy.
- Öner biıgınen körıne berulerıŋızge tılektespız!
Sūqbattasqan Erbolat Baiat, Qazaqstan Jazuşylar odaǧynyŋ müşesı, aqyn-jazuşy
"Adyrna" ūlttyq portaly
