بۇگىن جاڭاقورعان اۋدانىنىڭ «بىرلىك» جانە «قىراش» ەلدى مەكەندەرىنە گاز قۇبىرىن قوسۋ ءراسىمى ءوتتى. الداعى ۋاقىتتا تاعى دا 5 اۋىلعا «كوگىلدىر وتىن» كىرگىزۋ جوسپاردا بار. ءىس-شاراعا وبلىس اكىمى نۇرلىبەك نالىباەۆ قاتىسىپ، اۋىل تۇرعىندارىن قۇتتىقتادى.
«مەملەكەت باسشىسى قاسىم-جومارت كەمەلۇلى: «اسا ماڭىزدى ماسەلەلەردىڭ ءبىرى – اۋىلدى كەشەندى تۇردە دامىتۋ. اۋىلدارعا ناقتى قولداۋ كورسەتىپ، زاماناۋي ينفراقۇرىلىمدى دامىتۋىمىز كەرەك» دەگەن بولاتىن. پرەزيدەنتىمىز بەن ۇكىمەتتىڭ سىر ءوڭىرىن ەرەكشە قولداۋىنىڭ ارقاسىندا ايماعىمىزدا اۋقىمدى جوبالار جۇزەگە اسۋدا. وتكەن جىلى 14 گازداندىرۋ جوباسىن جۇزەگە اسىرۋعا 8,7 ملرد.تەڭگە ءبولىنىپ، يگەرىلدى. ناتيجەسىندە 6 اۋىلدى گازعا قوستىق.
وسىلايشا ءوڭىردىڭ گازداندىرۋ دەڭگەيى 70 پايىزعا جەتتى. بۇل – 26 ەلدى مەكەن، 583 مىڭعا جۋىق تۇرعىن تابيعي گازبەن قامتىلدى دەگەن ءسوز. بيىلعا رەسپۋبليكالىق بيۋدجەتتەن 7,4 ملرد. تەڭگە ءبولىنىپ، 2022 جىلى باستالعان 7 جوبا جالعاستى جانە 12 جاڭا جوبانىڭ قۇرىلىسى باستالادى. ونىڭ ىشىندە، جاڭاقورعان اۋدانىنىنىڭ «جايىلما»، «شالقيا»، «قۇتتىقوجا»، «تومەنارىق»، «كەيدەن» اۋىلدارىنا «كوگىلدىر وتىن» كىرگىزۋ جۇمىستارى باستالادى. بۇدان بولەك، وتكەن جىلى قۇنى 3,4 ملرد. تەڭگەنى قۇرايتىن جاڭاقورعان كەنتىندەگى 10/0,4 كۆ ەلەكترجەلىلىك جۇيەنى جاڭعىرتۋ جۇمىستارى قولعا الىنعان. سونىڭ ارقاسىندا كەنتتەگى 70 شاقىرىمعا جۋىق ەلەكتر جەلىسى جاڭارىپ، قوسىمشا جاڭادان 23 ترانسفورماتور ورناتىلادى»، – دەدى ايماق باسشىسى.
اۋىل تۇرعىندارىن قوعام قايراتكەرى بەكمىرزا ەلامانوۆ قۇتتىقتادى، «اقۇيىك» اۋىلدىق وكرۋگىنىڭ ارداگەرلەر كەڭەسىنىڭ توراعاسى ساۋلەبەك بەيسەنباەۆ العىس ءبىلدىرىپ، باتا بەردى.
ايتا كەتەيىك، «اقۇيىك» اۋىلدىق وكرۋگىندەگى «بىرلىك» اۋىلىنا گاز قۇبىرىن «Gas Energy Construction» جشس جۇرگىزدى. جوبا رەسپۋبليكالىق جانە وبلىستىق بيۋدجەتتەن قارجىلاندىرىلدى، ونى ىسكە اسىرۋ ناتيجەسىندە 440 تۇرعىن ءۇي مەن 5 الەۋمەتتىك نىسان گازداندىرىلدى.
مۇنان ءارى وبلىس اكىمى «قىراش» اۋىلىن گازعا قوسۋ راسىمىنە قاتىستى. بۇل ەلدى مەكەندە 124 تۇرعىن ءۇي مەن 6 الەۋمەتتىك نىسان «كوگىلدىر وتىنعا» قوسىلدى.
سالتاناتتى ءىس-شارادا ايماق باسشىسى اۋىل تۇرعىندارىن قۇتتىقتادى. قوعام قايراتكەرى يبراگيم ابيبۋللاەۆ ءسوز سويلەپ، اۋىلدىق وكرۋگتىڭ قوعامدىق كەڭەس توراعاسى سۇلتانحان اقىلبەكوۆ باتا بەردى. ءارى قاراي نۇرلىبەك ماشبەكۇلى «قىراش» اۋىلىنىڭ يمامى ابدىمالىك شاحانوۆتىڭ ۇيىنە بارىپ، گاز تۇتىنعان تۇرعىنداردىڭ قۋانىشىنا كۋا بولدى.
ەسكە سالساق، بيىل مەملەكەت باسشىسىنىڭ قولداۋىمەن اۋىلدىق جەرلەردە الەۋمەتتىك نىسانداردىڭ قۇرىلىسى قارقىندى جۇرۋدە. اتاپ ايتقاندا، «جايلى مەكتەپ» ۇلتتىق جوباسى اياسىندا الداعى 3 جىلدا وبلىستا 15 100 ورىنعا ارنالعان قۇنى 100 ملرد. تەڭگەدەن اساتىن 21 مەكتەپتىڭ قۇرىلىسى جۇرگىزىلەدى. بيىل 10 مەكتەپتىڭ قۇرىلىسى باستالادى. ونىڭ 2-ءۋى جاڭاقورعان اۋدانى ورتالىعىنان سالىنادى.
«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2023-2024 جىلدارى وبلىستا 27 دەنساۋلىق ساقتاۋ نىسانى سالىنادى. بيىل دارىگەرلىك امبۋلاتوريانىڭ قۇرىلىسى «قاراتوبە» اۋىلىندا، كەلەسى جىلى «تالاپ»، ابدىعاپپار اۋىلدارىندا باستالادى. ال، 2025 جىلعا قاراي جاڭاقورعان اۋدانارالىق اۋرۋحاناسىن «كوپبەيىندى اۋرۋحانا» دەڭگەيىنە جەتكىزۋ جۇمىستارى جۇرگىزىلۋدە.
مۇنان بولەك، «جايىلما»، «وزگەنت» اۋىلدارىندا 150 ورىندىق كلۋب، «اقجول» اۋىلىندا دەنەشىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلۋدە. نىساندار بيىل شىلدە ايىندا پايدالانۋعا بەرىلمەك.
