بۇگىن وبلىس اكىمى نۇرلىبەك نالىباەۆ جاڭاقورعان اۋدانىنا ءىسساپارى اياسىندا تۇركىستان وبلىسىمەن شەكارالاس اۋماققا كورىك بەرگەن كىرەبەرىس قاقپانى ارنايى بارىپ كورىپ، اۋىل تۇرعىندارىن قۇتتىقتادى.
«قازىرگى تاڭدا سىر ءوڭىرى سەرپىندى قۇرىلىس الاڭىنا اينالدى. ساۋلەتتى قۇرىلىس – وركەنيەت نىشانى، جاڭارۋ مەن جاڭعىرۋدىڭ جارشىسى. جاڭا، ەڭسەلى قاقپانى جەرلەسىمىز، «سمپ-قىزىلوردا» قۇرىلىس كومپانياسىنىڭ باسشىسى الىمقۇلوۆ تەمىرحان مالىكۇلى ءوز دەمەۋشىلىگىمەن سالدى. قۇرىلىسقا جەكە قاراجاتى ەسەبىنەن 200 ملن. تەڭگەدەن استام قاراجات جۇمسادى. تۋعان جەرگە جاناشىر ازاماتتىڭ ەڭبەگىنەن وزگەلەر ۇلگى الادى دەگەن سەنىمدەمىن. ەل پرەزيدەنتى مەن ۇكىمەتتىڭ سىر ءوڭىرىن ەرەكشە قولداۋىنىڭ ارقاسىندا ايماعىمىزدا اۋقىمدى جوبالار جۇزەگە اسۋدا. ەرەكشە اتاپ ءوتۋىمىز قاجەت، 2023 جىلعا وبلىس بيۋدجەتى 520,7 ملرد. تەڭگە كولەمىندە بەكىتىلگەن بولاتىن. كۇنى كەشە ناقتىلاۋمەن ونىڭ كولەمى 592,8 ملرد. تەڭگەگە جەتتى. بۇل 2022 جىلعى بيۋدجەت كولەمىمەن سالىستىرعاندا بۇل 205,5 ملرد. تەڭگەگە نەمەسە 1,5 ەسەگە ارتىق»، – دەپ اتاپ ءوتتى ايماق باسشىسى.جينالعان قاۋىمدى قوعام قايراتكەرى مۇرات باحتيارۇلى قۇتتىقتاپ، ەڭبەك ارداگەرى جارىلقاسىن ءشارىپوۆ قۇتتىقتاپ، باتا بەردى. ءىس-شارا سوڭىندا قاقپا ماڭىندا اۆتوكولىكتەر شەرۋى ۇيىمداستىرىلىپ، سالتاناتتى ءراسىمنىڭ ءسانىن كەلتىردى. ايتا كەتەيىك، جاڭادان سالىنعان قاقپانىڭ ەنى 43, بيىكتىگى 17 مەتر، سىرتقى قاسبەتى ۇلتتىق ناقىشتا بەزەندىرىلگەن. ەسكە سالساق، مەملەكەت باسشىسى قاسىم-جومارت كەمەلۇلى تۋعان جەرىنە جاناشىرلىقپەن قارايتىن كاسىپكەرلەردى پاتريوتيزم مەن الەۋمەتتىك جاۋاپكەرشىلىكتىڭ ۇلگىسىن كورسەتىپ، ەل ەكونوميكاسىن دامىتۋعا ۇلەس قوسۋعا شاقىرعان بولاتىن. بۇعان جەرگىلىكتى كاسىپكەرلەر، مەتسەناتتار بەلسەندى اتسالىسىپ، قايىرىمدىلىق شارالارىنا، تۋعان جەرىن تۇلەتىپ، كوركەيتۋگە كۇش-جىگەرىن سالۋدا. ماسەلەن، بەلگىلى كاسىپكەر مارات دۇيسەنباەۆتىڭ دەمەۋشىلىگىمەن قۇنى 1,5 ملرد. تەڭگەنى قۇرايتىن «اناعا تاعزىم» ورتالىعىنىڭ قۇرىلىسى جۇرگىزىلۋدە. شىلدە ايىندا پايدالانۋعا بەرىلەدى. «بالالار جىلىندا» دەمەۋشىلەر جالپى قۇنى 1,6 ملرد. تەڭگەگە 80 سپورت-ويىن الاڭىن سالىپ، بالدىرعاندارىمىزعا تارتۋ ەتتى. بۇل باستامانىڭ جالعاسى ءارى بيزنەستىڭ الەۋمەتتىك جاۋاپكەرشىلىگى اياسىندا قازىر قالاداعى كوپقاباتتى تۇرعىن ۇيلەردىڭ اۋلاسىن اباتتاندىرۋ، ەسكى كوپقاباتتى تۇرعىن ۇيلەردىڭ قاسبەتتەرىن جاڭارتۋ باستالدى. مۇنان بولەك، دەمەۋشىلەر ەسەبىنەن جاڭاقورعان اۋدانىندا قۇنى 790 ملن. تەڭگە بولاتىن زاماناۋي دەمالىس پاركى اشىلدى. سىرداريا اۋدانى ناعي ءىلياسوۆ اۋىلىندا قۇنى 450 ملن. تەڭگەنى قۇرايتىن «ەڭبەكشىلەر پاركى» بوي كوتەردى. ارال اۋدانى توقاباي اۋىلىنداعى اپاتتى دەپ تانىلعان مەكتەپ جەكە ينۆەستور ەسەبىنەن 500 ملن.تەڭگەگە قايتا سالىنۋدا. نىساندى الداعى تامىز ايىندا پايدالانۋعا بەرۋ جوسپارلانعان. وتكەن ايدا بولات وتەمۇراتوۆ قورىنىڭ قولداۋىمەن قۇنى 31 ملن. اقش دوللارىن قۇرايتىن «قورقىت اتا» اۋەجايىنىڭ جاڭا تەرمينالىنىڭ ىرگەتاسى قالاندى. نىسان 2024 جىلى پايدالانۋعا بەرىلمەك. بۇعان قوسا «قازگەرمۇناي» ۇلتتىق كومپانياسى باسشىلىعىمەن كەلىسىم ناتيجەسىندە قىزىلوردا قالاسىندا زاماناۋي ۇلگىدەگى «وقۋشىلار سارايىنىڭ» جوباسى باستالادى.
