26 ءساۋىر كۇنى قر مادەنيەت جانە سپورت ۆيتسە-ءمينيسترى سارسەن ابايۇلى قۇرانبەك جۇمىس ساپارىمەن قىزىلوردا وبلىسىنا كەلدى.
ۆيتسە-مينيستر ءا.تاجىباەۆ اتىنداعى وبلىستىق امبەباپ عىلىمي كىتاپحاناسىندا تۇرعىندارمەن كەزدەستى.
جيىندى قىزىلوردا وبلىسى اكىمى اپپاراتىنىڭ باسشىسى بايمانوۆ شاحماردان اسقارۇلى جۇرگىزىپ، وڭىردەگى سپورت سالاسى جەتىستىكتەرى مەن دامۋ ديناميكاسىنا قىسقاشا توقتالىپ ءوتتى.
سونداي-اق، كەزدەسۋگە وبلىستىق مادەنيەت جانە سپورت باسقارماسىنا قاراستى مەكەمە باسشىلارى، جاتتىقتىرۋشىلار جانە قوعام بەلسەندىلەرى مەن باق وكىلدەرى قاتىستى.
سارسەن ابايۇلى ءوز ءسوزىن "قاسيەتتى قورقىت بابانىڭ رۋحىمەن تىنىستاعان كيەلى وڭىردە وزدەرىڭىزبەن كەزدەسىپ وتىرعانىما قۋانىشتىمىن" دەپ باستادى. ۆيتسە-مينيستر ساپارىنىڭ باستى مىندەتى ەلىمىزدە ءجۇرىپ جاتقان رەفورمالار تۋرالى حالىقتى اقپاراتتاندىرۋ، مەملەكەتتىك ورگانداردىڭ ەل تۇرعىندارى الدىنداعى جاۋاپكەرشىلىگى مەن جۇمىسىن كۇشەيتۋ ەكەندىگىن ايتتى. وسى ورايدا ول مينيسترلىك تاراپىنان اتقارىلىپ جاتقان جۇمىستارعا توقتالىپ ءوتتى.
كەزدەسۋدەن سوڭ س.قۇرانبەك قوعام بەلسەندىلەرى مەن باق وكىلدەرىنىڭ سۇراقتارىنا جاۋاپ بەرىپ، تۇرعىندارعا جەكە قابىلداۋ وتكىزدى.
ەندىگى كەزەكتە ۆيتسە-ءمينيستردى "NAMAN ATA" سپورت كەشەنىنىڭ قۇرىلتايشىسى مۇرات ابايۇلى سارسەنباەۆ كەشەن جۇمىسىمەن تانىستىردى.
كەشەندە سارسەن ابايۇلى جاتتىعۋ وتكىزىپ جاتقان بالالارمەن سۇحباتتاسىپ، ولارعا بولاشاق ەل نامىسىن قورعار چەمپيون بولۋىن تىلەدى.
ۆيتسە-ءمينيستردىڭ سوڭعى نىسانى جاڭاقورعان اۋدانىنىنىڭ جەرگىلىكتى سپورت كەشەنى بولدى. مۇندا ول گاندبول، باسكەتبول جانە ۇستەل تەننيسىمەن اينالىسۋشى جاس سپورتشىلارمەن كەزدەستى. سونان سوڭ، اۋداندىق يپپودرومداعى كوكپارشىلاردىڭ جاتتىعۋىن تاماشالاپ، جەتىستىكتەرى مەن الداعى جوسپارلارى جايىندا اقپارات الدى. سارسەن ابايۇلى كوكپار سپورتىن دامىتۋ بويىنشا اۋداندىق سپورت سالاسى باسشىلارىنىڭ بىلدىرگەن ۇسىنىستارىن قولداپ، ەلىمىزدە ۇلتتىق سپورتتى دامىتۋ ماسەلەسى قاشان دا الدىڭعى ورىندا تۇرۋى قاجەت ەكەندىگىن تىلگە تيەك ەتتى. سونداي-اق ول مينيسترلىك تاراپىنان ۇلتتىق سپورت تۇرلەرىن دامىتۋ ءۇشىن بارلىق جاعداي جاسالىپ، ۇسىنىستار قاشان دا قابىلداناتىندىعىن جەتكىزدى.
