ماسىلدىقتان ارىگە كەتكەندەر

وسى جىلعى رامازان ايىندا ءبىرشاما مۇسىلماننىڭ دۇعاسى قابىل بولسا، ەندى ءبىراز جۇرتتىڭ قارنى تويىپ قالدى. اۋىزاشار اسىنا قىرعيداي تيگەندەردىڭ ۆيدەوسى الەۋمەتتىك جەلىنى شارلاپ، قوعامدا ۇلكەن داۋ تۋعىزدى. مۇنى ءبىرى «ماسىلدىقتىڭ شارىقتاۋ شەگى» دەسە، ەندى ءبىر جۇرت «قارنى اش ادامدار ارامىزدى كوپ، وسىنداي مىسكىندەردى تويدىرۋ كەرەك» دەسىپ جاتتى. اڭگىمەنىڭ اۋانىن تۇسىنبەي جاتقان وقىرمان ءۇشىن ءسال كەرى شەگىنىس جاساپ كەتسەك. رامازان ايىندا ەلىمىزدەگى بارلىق مەشىتتەردە اۋىزاشار بەرىلەدى. بىراق، مىڭداعان ادام ءۇشىن داستارحان جايىلمايتىنى بەلگىلى. مەشىتكە اۋىزاشۋعا نيەتتەنىپ كەلگەن جۇزدەگەن ادام ءۇشىن اۋىزاشار داستارحانى جايىلادى. وسى جىلى الماتى قالاسى ورتالىق مەشىتىندەگى بىرنەشە وقيعا قوعام نازارىنا ىلىكتى. سونىڭ ءبىرى – اۋىزاشار ۋاقىتى كىرە سالىسىمەن جايۋلى داستارحانعا جاپاتارماعاي يمەنگەن كوپشىلىك. اشتىقتان كەلگەندەي قولدارىنا ءبىر-ءبىر دوربا ۇستاپ، ءبىر قولىمەن اۋىزىنا، ەكىنشى قولمەن دورباعا داستارحانداعى ىلىككەن ازىقتى سالىپ جاتقانداردىڭ ارەكەتى قوعامدا نارازىلىق تۋدىردى. بەت-بەينەسىنە قاراساڭ ءتاپ-ءتاۋىر كيىنگەن ادامدار. بىراق، ماسىلدىق بويىن دەندەپ العان با دەرسىڭ. ەل ىشىندە مۇنداي وقيعالاردى كوپتەپ بايقاۋعا بولادى. ءبىر كۇنى مەشىت جانىنان قوراپ تولى ۇلتتىق سۋسىنىمىز شۇبات الىپ ءوتىپ بارا جاتساق، كوشەدەن ءوتىپ بارا جاتقان اياق-قولى بالعاداي، ەڭگەزەردەي جىگىت اعاسى «ءسۇت الىپ بارا جاتىرسىڭدار ما، ماعان بىرەۋىن بەرىڭدەرشى، ءوتىنىش» دەپ قيىلا كەتتى. «تەگىن ەمەس، ساتۋ ءۇشىن مۇنىڭ ءبارى» دەسەك تە قويماي «ءوتىنىپ سۇرايمىن بىرەۋىن عانا بەرسەڭدەر بولدى» دەيدى. سوندا بۇل نە؟ پاتەرناليستىك كوڭىل-كۇيدىڭ مۇشكىل احۋالىن كورسەتىپ تۇر. قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءوزىنىڭ  «حالىق بىرلىگى جانە جۇيەلى رەفورمالار – ەل وركەندەۋىنىڭ نەگىزى» اتتى قازاقستان حالقىنا جولداۋىندا «قازاقستان – الەۋمەتتىك مەملەكەت. سوندىقتان، قيىن جاعدايعا تاپ بولعان ازاماتتارعا جان-جاقتى كومەك كورسەتۋ – باستى مىندەتتەردىڭ ءبىرى.  الايدا، قوعامدا پاتەرناليستىك كوڭىل-كۇي جانە الەۋمەتتىك ماسىلدىق ءۇردىسى بەلەڭ الۋدا. ەل ىشىندە الەۋمەتتىك باعدارلامالاردى ادەيى جەكە مۇددەسىنە پايدالاناتىن ازاماتتار از ەمەس. مۇنداي ادامدار كەز-كەلگەن وركەنيەتتى ەلدەگى سياقتى زاڭنىڭ جانە بۇكىل قوعامنىڭ الدىندا جاۋاپ بەرۋى كەرەك» دەپ باسىپ ايتقان بولاتىن.