مەملەكەت باسشىسىنىڭ تاپسىرماسىنا سايكەس، تۇرعىن ءۇي كوممۋنالدىق شارۋاشىلىعىن جاڭعىرتۋ، جىلدار بويى قوردالانعان ينفراقۇرىلىم ماسەلەسىن شەشۋ جانە وتاندىق ءوندىرىستى دامىتۋعا قاتىستى قىزىلوردا قالاسىندا ىلكىمدى ىستەر جۇزەگە اسۋدا.
قالانىڭ سول جاعالاۋىندا قۇرىلىسى باستالعان 84 پاتەرلى 7 قاباتتى 6 تۇرعىن ءۇي بوي تۇزەدى. جانىندا كوپقاباتتى 10 ءۇيدىڭ قۇرىلىسى باستالعان.
سونىمەن قاتار، سۇلتان بەيبارىس كوشەسىنىڭ ن.نازارباەۆ داڭعىلىنان تاۋەلسىزدىك داڭعىلىنا دەيىنگى ارالىقتا اباتتاندىرۋ جۇمىستارى جۇرۋدە. كوشەنىڭ ءبىر شاقىرىمعا سوزىلعان ءبىر بولىگى 6 جولاقتى. سونداي-اق، كوشەنىڭ بويىنا ەكى سۋبۇرقاق، سكۆەرلەر مەن بالالار ويىن الاڭدارى سالىنباق.
ال، ن.نازارباەۆ داڭعىلىنان قىزىلوردا-قۇمكول تراسساسىنا دەيىنگى جول قايتا جاڭعىرتۋدان وتۋدە. اتالعان اۋماقتاعى جوندەۋ جۇمىستارىن «ۋاد» جشس جۇرگىزۋدە. بۇعان دەيىن كولىك اعىنى تولاستامايتىن رەسپۋبليكالىق ماڭىزى بار كوشەنىڭ تارلىعىنان جولاۋشىلار مەن سول ماڭداعى تۇرعىندار قاۋىپسىزدىگى وزەكتى ماسەلە بولىپ كەلگەن ەدى. جاقىندا بۇل ماسەلە دە شەشىمىن تاباتىن بولادى. سۇلتان بەيبارىس كوشەسىن اباتتاندىرۋ جانە قايتا جاڭعىرتۋ قازان-قاراشا ايلارىندا تولىق اياقتالادى دەپ كۇتىلۋدە.
ايتا كەتۋ كەرەك، قىزىلوردا قالاسىنا قاراستى تاسبوگەت كەنتىندە دەنەشىنىقتىرۋ-ساۋىقتىرۋ كەشەنى كەنت تۇرعىندارى ءۇشىن ماڭىزدى جوبالاردىڭ ءبىرى. نىساننىڭ قۇنى – 542,1 ملن تەڭگە. جوبا قۇرىلىسى 2024 جىلدىڭ ناۋرىز ايىندا بىتەدى. جاۋاپتى مەردىگەر «ينتەگروستروي» جشس.
ساياحات تۇرعىن اۋدانىنداعى ش.باكىروۆا كوشەسىندە دە جۇمىس قىزۋ جۇرۋدە. ءبىر شاقىرىمعا جۋىق اۋماقتى ورتاشا جوندەۋدەن وتكىزۋدى مەردىگەر كومپانيا "قىزىلوردا-تراست" جشس-ءى باستاپ كەتتى.
قازىرگى تاڭدا، ايماقتىڭ باس شاھارىندا جۇرگىزىلىپ جاتقان بارلىق الەۋمەتتىك نىساندار مەن تۇرعىن ءۇي قۇرىلىستارى قارقىندى جۇرۋدە.
