تۇركيادا پرەزيدەنت سايلاۋى باستالدى. مەملەكەت باسشىسى بولۋعا ءۇش ۇمىتكەر تالاسۋدا، دەپ حابارلايدى “ادىرنا” ءتىلشىسى.
ونىڭ ءبىرى - قازىرگى پرەزيدەنت رەجەپ تايىپ ەردوعان.
تۇركيا ازاماتتارى ءۇش كانديداتتىڭ بىرىنە داۋىس بەرە الادى:
- ەلدىڭ قازىرگى باسشىسى رەجەپ تايىپ ەردوعان;
- التى وپپوزيتسيالىق پارتيانىڭ كواليتسيا كانديداتى جانە رەسپۋبليكالىق حالىق پارتياسىنىڭ توراعاسى كەمال كىلىچداروعلۋ;
- "اتاتۇرىكشىلەر اليانسىنان" ۇمىتكەر سينان وگان.
ءتورتىنشى ۇمىتكەر مۋحاررەم ينجە سايلاۋعا ءۇش كۇن قالعاندا پرەزيدەنتتىك سايلاۋدان شىعىپ قالدى. ينس پرەزيدەنتتىك جارىستان باس تارتۋ سەبەبىن وعان ءارتۇرلى ارانداتۋشىلىق پەن جالعان اقپارات تۇرىندەگى شامادان تىس قىسىم دەپ اتادى.
ايتا كەتەيىك، رەجەپ تايىپ ەردوعان جەڭىسكە جەتكەن جاعدايدا بۇل ونىڭ ءۇشىنشى رەت پرەزيدەنتتىككە سايلانۋى بولماق. ول العاش رەت مەملەكەت باسشىسى لاۋازىمىنا 2014 جىلدىڭ تامىزىندا كەلدى. 2018 جىلى 24 ماۋسىمدا ەلىمىزدە وتكەن پرەزيدەنتتىك سايلاۋدا ول 52,59 پايىز داۋىس جيناپ، وسى لاۋازىمعا قايتا سايلاندى.
سايلاۋدىڭ ءبىرىنشى كەزەڭىندە جەڭىسكە جەتۋ ءۇشىن مەملەكەت باسشىسى لاۋازىمىنا ۇمىتكەر 50 پايىزدان استام داۋىس جيناۋى كەرەك. ايتپەسە، سايلاۋدىڭ ەكىنشى كەزەڭى وتەدى. وعان بىرىنشىسىندە ەڭ كوپ قولداۋ تاپقان ەكى ۇمىتكەر قاتىسادى.
ەسكە سالايىق، 6 اقپاندا تۇركيانىڭ وڭتۇستىك-شىعىسىندا ماگنيتۋداسى 7,7 بولاتىن ەڭ اۋىر جەر سىلكىنىسى بولدى، سالدارىنان 40 مىڭنان استام ادام قازا تاپتى.
ەل پرەزيدەنتى رەجەپ تايىپ ەردوعاننىڭ ايتۋىنشا، بۇل جەر سىلكىنىسى تۇركيا تاريحىنداعى ەڭ جويقىن تابيعي اپات ەكەنىن ايتتى. 1939 جىلعى جەر سىلكىنىسىنەن اسىپ ءتۇستى. تۇركيادا بولعان جەر سىلكىنىستەرى الەمدە بۇرىن-سوڭدى تىركەلگەن ەڭ ءىرى جەر سىلكىنىستەرىنىڭ وندىعىنا كىردى.
ءزىلزالا تەك تۇرعىن ۇيلەردى عانا ەمەس، سونىمەن قاتار تاريحي جانە مادەني قۇندىلىعى بار شىركەۋلەردى، مەشىتتەردى، عيماراتتاردى قيراتتى.
دۇنيەجۇزىلىك بانكتىڭ باعالاۋىنشا، جەر سىلكىنىسىنەن كەلگەن تىكەلەي مۇلىكتىك زالال 34,2 ميلليارد دوللاردى قۇرايدى.تۇركيا قارجى مينيسترلىگى زالال سوماسى 2 تريلليون ليرا (105 ميلليارد دوللار) نەمەسە 2023 جىلعى ۇلتتىق تابىستىڭ 9%-ى دەپ ەسەپتەيدى.
وسىنشاما شىعىندارعا قاراماستان، تۇركيا پرەزيدەنتتىك جانە پارلامەنتتىك سايلاۋ وتكىزۋدە.
