وتباسى – مەملەكەتتىڭ باستى قۇندىلىعى ءارى ادامزات بالاسىنىڭ بويىنا ۇلتتىق تاربيەنى، ادامگەرشىلىك قاسيەتتى دارىتۋدىڭ نەگىزگى دىڭگەگى بولىپ سانالادى. سوڭعى ۋاقىتتا قوعامدا وتباسىنداعى بالا تاربيەسى، اتا-انانىڭ جانۇياداعى ءرولى مەن جاۋاپكەرشىلىگى تۋرالى سان الۋان پىكىرلەر تالقىعا سالىنۋدا. سونىڭ ءبىرى – بالا تاربيەسى. اقپاراتتىق اعىن جان-جاققا قاراتپاي قاتتى اعىسپەن اعىپ جاتقاندا پسيحولوگياسى ەندى قالىپتاسىپ جاتقان بالانى ودان اراشالاپ قالۋ البەتتە قيىن. ال بۇل تۇرعىدا اكە-شەشەنىڭ بالاعا دۇرىس كوڭىل ءبولۋى قانشالىقتى ماڭىزدى؟
بۇگىن وڭىرلىك كوممۋنيكاتسيالار قىزمەتىنىڭ اقپارات الاڭىندا اتالمىش ماسەلەگە قاتىستى بريفينگ ءوتىپ، وتباسى قۇندىلىعى تۋرالى ءسوز ەتىلدى.
-ءبىزدىڭ وڭىرىمىزدە 25-تەن اسا ۇكىمەتتىك ەمەس ۇيىم مەن انالار كەڭەسى بار. بۇل ۇيىمدار وتباسى ساياساتى مەن انالار ينستيتۋتىن قالىپتاستىرۋدا اۋقىمدى جۇمىستار اتقارىپ كەلەدى. قحا جانىنداعى انالار كەڭەسى مەن ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا وتباسىنداعى انا مەن اكەنىڭ ءرولى، بالا تاربيەسى تۋرالى نەگىزگى شارالاردى بەلسەندى قولعا الۋدا. وزدەرىڭىز بىلەتىندەي، وتباسىنداعى بەرەكە-بىرلىك بۇل – ەلىمىزدىڭ بىرلىگىنىڭ بەكەمدىگىن ايعاقتايدى. سول ءۇشىن وتباسى ينستيتۋتىن قالىپتاستىرۋدا اتالمىش ۇيىمداردىڭ جۇمىسى اسا ماڭىزدى، - دەدى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا حاتشىسى قالامقاس كاريموۆا.
بۇگىندە وتباسى قۇندىلىعىن كەڭىنەن ناسيحاتتاۋ جانە ۇلگىلى جانۇيالاردى قوعامدا دارىپتەۋ ماقساتىندا قالا جانە بارلىق اۋدانداردا قحا جانىنداعى انالار كەڭەسى جۇمىس ىستەۋدە. انالار كەڭەسىنىڭ نەگىزگى مىندەتى – اتا-انامەن بالا اراسىنداعى قارىم-قاتىناستى دامىتۋ، انا بولۋ ينستيتۋتىن قالىپتاستىرۋ جانە جانۇياداعى ۇلتتىق سالت-داستۇرلەردى نىعايتۋ بولىپ تابىلادى.
- سوڭعى ۋاقىتتا كوپ وتباسىلاردا كەزدەسەتىن ماسەلەلەر - جاسوسپىرىمدەر اراسىنداعى تارتىپسىزدىكتىڭ كوبەيۋى، اتا-انا جاۋاپكەرشىلىگىنىڭ تومەندەۋى، ەندى عانا جانۇيا قۇرعان جاستاردىڭ لەزدە اجىراۋى، كەلىن مەن ەنەنىڭ اراسىنداعى داۋ ۋشىعىپ بارادى. جالپى وتباسىنداعى ماسەلەنىڭ دۇرىس شەشىم تابۋى تىكەلەي اتا-اناعا بايلانىستى. ويتكەنى، اكەنىڭ جانۇيا الدىنداعى ءوز جاۋاپكەرشىلىگى بار، انانىڭ ءوزى ورىندايتىن مىندەتى بار. مۇنى دۇرىس ۇيلەستىرىپ وتىرۋ ەر مەن ايەلگە بايلانىستى. ال بالا تاربيەسىنە اكە مەن انا تەڭدەي جاۋاپتى. قازىرگى تاڭدا ءبىلىم وشاقتارىندا جاس بالالار ەلەكتروندى شىلىم شەگۋگە اۋەستەنىپ بارادى. ال بالانىڭ وسىنداي زياندى قىلىققا بوي الدىرعانىن اتا-انا بىلمەۋى مۇمكىن. وسى ماسەلەگە بايلانىستى ءبىزدىڭ انالار كەڭەسى الەۋمەتتىك جەلىلەردە اتا-انالارمەن بايلانىسىپ، دۇكەندەردە جاسوسپىرىمدەرگە ەلەكتروندى شىلىمداردى ساتۋعا تىيىم سالاتىن شارالاردى قولعا الدى. بۇدان بولەك، ءبىزدىڭ ۇيىم مەكتەپتەر مەن كوللەدجدەردە عانا ەمەس، اتا-انامەن جاسوسپىرىمدەردى جالپى قامتيتىن اۋقىمدى ءىس-شارالار مەن جيىندار ۇيىمداستىرۋدا. وندا قاجەتتى مامانداردىڭ كەڭەسىن الىپ، وزدەرىن تولعاندىرعان ماسەلەلەرىن ورتاعا سالادى. مۇنداي ءىس-شارالاردى ءجيى-ءجيى وتكىزىپ تۇرۋىمىز كەرەك، - دەدى قحا جانىنداعى وبلىستىق انالار كەڭەسىنىڭ ءتورايىمى نۇرساۋلە مۇساەۆا.
