Otbasy – memlekettiń basty qundylyǵy ári adamzat balasynyń boıyna ulttyq tárbıeni, adamgershilik qasıetti darytýdyń negizgi dińgegi bolyp sanalady. Sońǵy ýaqytta qoǵamda otbasyndaǵy bala tárbıesi, ata-ananyń januıadaǵy róli men jaýapkershiligi týraly san alýan pikirler talqyǵa salynýda. Sonyń biri – bala tárbıesi. Aqparattyq aǵyn jan-jaqqa qaratpaı qatty aǵyspen aǵyp jatqanda psıhologııasy endi qalyptasyp jatqan balany odan arashalap qalý álbette qıyn. Al bul turǵyda áke-shesheniń balaǵa durys kóńil bólýi qanshalyqty mańyzdy?
Búgin Óńirlik kommýnıkaııalar qyzmetiniń aqparat alańynda atalmysh máselege qatysty brıfıng ótip, otbasy qundylyǵy týraly sóz etildi.
-Bizdiń óńirimizde 25-ten asa úkimettik emes uıym men analar keńesi bar. Bul uıymdar otbasy saıasaty men analar ınstıtýtyn qalyptastyrýda aýqymdy jumystar atqaryp keledi. QHA janyndaǵy Analar keńesi men áıelder isteri jáne otbasylyq-demografııalyq saıasat jónindegi komıssııa otbasyndaǵy ana men ákeniń róli, bala tárbıesi týraly negizgi sharalardy belsendi qolǵa alýda. Ózderińiz biletindeı, otbasyndaǵy bereke-birlik bul – elimizdiń birliginiń bekemdigin aıǵaqtaıdy. Sol úshin otbasy ınstıtýtyn qalyptastyrýda atalmysh uıymdardyń jumysy asa mańyzdy, - dedi Áıelder isteri jáne otbasylyq-demografııalyq saıasat jónindegi komıssııa hatshysy Qalamqas Karımova.
Búginde otbasy qundylyǵyn keńinen nasıhattaý jáne úlgili januıalardy qoǵamda dáripteý maqsatynda qala jáne barlyq aýdandarda QHA janyndaǵy analar keńesi jumys isteýde. Analar keńesiniń negizgi mindeti – ata-anamen bala arasyndaǵy qarym-qatynasty damytý, ana bolý ınstıtýtyn qalyptastyrý jáne januıadaǵy ulttyq salt-dástúrlerdi nyǵaıtý bolyp tabylady.
- Sońǵy ýaqytta kóp otbasylarda kezdesetin máseleler - jasóspirimder arasyndaǵy tártipsizdiktiń kóbeıýi, ata-ana jaýapkershiliginiń tómendeýi, endi ǵana januıa qurǵan jastardyń lezde ajyraýy, kelin men eneniń arasyndaǵy daý ýshyǵyp barady. Jalpy otbasyndaǵy máseleniń durys sheshim tabýy tikeleı ata-anaǵa baılanysty. Óıtkeni, ákeniń januıa aldyndaǵy óz jaýapkershiligi bar, ananyń ózi oryndaıtyn mindeti bar. Muny durys úılestirip otyrý er men áıelge baılanysty. Al bala tárbıesine áke men ana teńdeı jaýapty. Qazirgi tańda bilim oshaqtarynda jas balalar elektrondy shylym shegýge áýestenip barady. Al balanyń osyndaı zııandy qylyqqa boı aldyrǵanyn ata-ana bilmeýi múmkin. Osy máselege baılanysty bizdiń analar keńesi áleýmettik jelilerde ata-analarmen baılanysyp, dúkenderde jasóspirimderge elektrondy shylymdardy satýǵa tyıym salatyn sharalardy qolǵa aldy. Budan bólek, bizdiń uıym mektepter men kolledjderde ǵana emes, ata-anamen jasóspirimderdi jalpy qamtıtyn aýqymdy is-sharalar men jıyndar uıymdastyrýda. Onda qajetti mamandardyń keńesin alyp, ózderin tolǵandyrǵan máselelerin ortaǵa salady. Mundaı is-sharalardy jıi-jıi ótkizip turýymyz kerek, - dedi QHA janyndaǵy oblystyq Analar keńesiniń tóraıymy Nursáýle Musaeva.
