7 مامىر مەن 9 مامىر مەرەكەلەرى قارساڭىندا ءالىمجانوۆ كوشەسىندەگى 40 جانە 20 پاتەرلىك جالگەرلىك ۇيلەردەگى پاتەرلەردىڭ كىلتى كەزەكتە تۇرعان ازاماتتارعا بەرىلدى. ناتيجەسىندە تالدىقورعان قالاسىندا 60 وتباسى ءۇيلى بولدى.
ءوز قۇتتىقتاۋ سوزىندە بەيبىت يساباەۆ تالدىقورعان قالاسىندا سوڭعى ەكى جىلدا تۇرعىن ءۇي قۇرىلىسى باسەڭدەپ، ءۇي بەرۋ ءبىرشاما كەشەۋىلدەگەنىن ايتىپ، وعان قۇرىلىس جۇرگىزگەن مەردىگەرلەردىڭ جاۋاپسىزدىعى، باستاعان قۇرىلىستى اياقسىز قالدىرۋى، كوروناۆيرۋس ىندەتى سياقتى كوپتەگەن سەبەپتەر تەرىس اسەرىن تيگىزگەنىن اتاپ ءوتتى. كەزەكسىز ءۇي بەرۋدىڭ كوپتەگەن فاكتىلەرى ورىن العانى دا تىلگە تيەك ەتىلدى. قازىر زاڭسىز بەرىلگەن ۇيلەردى سوت ارقىلى قايتارىپ الۋ جۇمىستارى ءجۇرىپ جاتىر.
«تۇرعىن ۇيمەن قامتاماسىز ەتۋ – حالىقتىڭ ءومىر ءسۇرۋ ساپاسىن كوتەرۋدەگى ەڭ باستى ماسەلەلەردىڭ ءبىرى. پرەزيدەنتتىڭ الدىمىزعا قويىپ وتىرعان ۇلكەن تالابى دا وسى. سوندىقتان مەملەكەتتىك باعدارلامالاردىڭ ارقاسىندا ءبىز قازىر وسى ماسەلەگە ەرەكشە نازار اۋدارىپ، قولعا الىپ وتىرمىز. قازىر تالدىقورعان قالاسىندا تۇرعىن ءۇي كەزەگىندە 15 مىڭداي ادام تۇر. ادىلدىكپەن، اشىقتىقپەن جۇمىس ىستەي وتىرىپ، ولاردى كەزەك رەتى بويىنشا الداعى بىرنەشە جىلدا باسپانامەن قامتۋ ءۇشىن قۇرىلىس قارقىنىن جىلدامداتىپ، تۇرعىن ءۇي سالۋ كولەمىن ارتتىراتىن بولامىز»، - دەدى ب.يساباەۆ.
«نۇرلى جەر» باعدارلاماسىمەن تۇرعىزىلعان بۇل ۇيگە كەزەكتەگى 60 ازامات قول جەتكىزدى. ولاردىڭ دەنى كوپ بالالى جانە تولىق ەمەس وتباسىلار، مۇمكىندىگى شەكتەۋلى جاندار مەن وسىنداي بالا اسىراپ وتىرعان جانۇيالار، جەتىم بالالار، اۋعان سوعىسىنىڭ ارداگەرلەرى جانە باسقا دا الەۋەمەتتىك وسال توپقا جاتاتىن ازاماتتار.
جاڭا باسپاناعا كىرگەندەر اتىنان مۇگەدەك بالا اسىراۋشى وتباسىنان اقمارال الشىنباەۆا، تولىق ەمەس وتباسى ساناتىنداعى نازگۇل بەيسەنبەكوۆا جانە باسقا دا قونىستوي يەلەرى مەملەكەتتەن جاسالىپ وتىرعان قامقورلىق ءۇشىن ريزاشىلىقتارىن ءبىلدىرىپ، باسپاناعا يە بولعان كورشىلەرىنە ىزگى تىلەكتەرىن جەتكىزدى.
وبلىس اكىمى بەيبىت يساباەۆ زەينەتكەر شامشامانۋ ابەۋوۆا مەن كوپ بالالى بەيىسبەكوۆتار شاڭىراعىنا كىرىپ، ءدام تاتىپ، تەلەديدار سىيعا تارتتى.
«وتاعاسى تىلەۋلى ەكەۋمىز الپىس جىلدان استام بىرگە عۇمىر كەشىپ كەلەمىز. اقسۋ اۋدانىندا ۇزاق جىل پەداگوگيكا سالاسىندا جۇمىس ىستەدىم. ەڭبەگىم ەلەۋسىز قالعان جوق، شۇكىر. بەس ۇل، ءبىر قىز تاربيەلەپ وسىردىك. ەكى بالام ءوزىمنىڭ جولىمدى قۋىپ، مۇعالىم بولدى. بۇگىن ۇلكەن قۋانىشقا جەتىپ وتىرمىز. وسىنداي جاقسى جاڭالىقتار كوپ بولا بەرسىن. ەل ىرگەسى امان، ءوسىپ كەلە جاتقان بالا-شاعانىڭ ءومىرى جارقىن بولسىن دەپ تىلەيمىن»، - دەدى ءبىلىم سالاسىندا ۇزاق جىل ەڭبەك ەتكەن زەينەتكەر، «ءبىلىم سالاسىنىڭ ۇزدىگى» شامشامانۋ ابەۋوۆا.
جالپى بۇگىن قولدانىسقا بەرىلگەن 20 پاتەرلىك ۇيدە 5 ەكى بولمەلى، 15 ءۇش بولمەلى پاتەر بولسا، 40 پاتەرلىك ۇيدە 10-ى – ءبىر بولمەلىك، 10-ى ەكى بولمەلىك، 20-سى – ءۇش بولمەلىك پاتەرلەر. پاتەرلەردىڭ جالپى الاڭى تيىسىنشە 1373 م2 جانە 2354,9 م2. بۇل ۇيلەردى سالۋعا «نۇرلى جەر» باعدارلاماسى بويىنشا 722 ملن. تەڭگە ءبولىنىپ، يگەرىلگەن.
ەسكە سالساق، وبلىس كولەمىندە بيىل 321,9 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. سول قاتاردا جىل سوڭىنا دەيىن تالدىقورعان قالاسىندا 51 تۇرعىن ءۇي قولدانىسقا بەرىلەدى. سونىڭ 42-ءسى جەرگىلىكتى بيۋدجەتتەن سالىنسا، قالعانىن جەكە كاسىپكەرلەر مەن مەتسەناتتار ءوز قاراجاتتارىنا تۇرعىزىپ جاتىر. ءسويتىپ ءبىر جىلدا 2 مىڭعا جۋىق تالدىقورعاندىق وتباسى باسپانالى بولادى دەپ كۇتىلۋدە.
