الماتى وبلىسىنداعى قىلمىستىق-اتقارۋ جۇيەسىنە قاراستى №10 مەكەمەدە ەكى جاڭا وندىرىستىك نىسان — «INFINITEL» جانە «برومارت» كاسىپورىندارى ىسكە قوسىلدى. ناتيجەسىندە 100 جاڭا جۇمىس ورنى اشىلىپ، جازاسىن وتەۋشىلەردى تۇراقتى جۇمىسپەن قامتۋعا باعىتتالعان جۇيەلى جۇمىستاردىڭ كەزەكتى كەزەڭى جۇزەگە استى.
جاڭا ءوندىرىس ورىندارىنىڭ قىزمەتىمەن وبلىس اكىمى مارات سۇلتانعازيەۆ، سالالىق ۆەدومستۆولاردىڭ باسشىلارى جانە بيزنەس-قوعامداستىق وكىلدەرى تانىستى. مەملەكەتتىك ورگاندار مەن جەكە سەكتور اراسىنداعى ءتيىمدى ارىپتەستىك ناتيجەسىندە ەل باسشىلىعى قويعان جازاسىن وتەۋشىلەردى قايتا الەۋمەتتەندىرۋدىڭ تيىمدىلىگىن ارتتىرۋ جانە قاج مەكەمەلەرىندەگى وندىرىستىك الەۋەتتى دامىتۋ جونىندەگى تاپسىرمالار كەزەڭ-كەزەڭىمەن ورىندالىپ كەلەدى.
وڭىردە جازاسىن وتەۋشىلەردى جۇمىسپەن قامتۋ دەڭگەيى 41 پايىزدان 65 پايىزعا دەيىن ارتتى. بۇل ناتيجەگە كاسىپكەرلەرمەن بىرلەسىپ ىسكە اسىرىلعان وقىتۋ باعدارلامالارى مەن وندىرىستىك جوبالاردىڭ قوسقان ۇلەسى زور. اتاپ ايتقاندا، «اتامەكەن» كاسىپكەرلەر پالاتاسى ۇيىمداستىرعان تەگىن كۋرستار اياسىندا 250 ادام سەرتيفيكات الىپ، ولاردىڭ 78-ءى تۇراقتى جۇمىسقا ورنالاستى.
ءوڭىر باسشىسى مارات سۇلتانعازيەۆ قاج مەكەمەلەرىندەگى وندىرىستىك ينفراقۇرىلىمدى دامىتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ ءوتتى.
«بۇل كاسىپورىنداردىڭ ىسكە قوسىلۋى قازاقستان پرەزيدەنتى قاسىم-جومارت توقاەۆتىڭ تاپسىرمالارىن ناقتى ىسكە اسىرۋدىڭ ايقىن كورىنىسى. ەڭبەك — جازاسىن وتەۋشىلەردى قوعامعا قايتا بەيىمدەۋدىڭ ەڭ ءتيىمدى تەتىكتەرىنىڭ ءبىرى. وسىنداي جوبالار ارقىلى ءبىز ولارعا جاڭا مۇمكىندىك ۇسىنىپ، بولاشاققا دەگەن جاۋاپكەرشىلىكتى قالىپتاستىرامىز»، — دەدى وبلىس اكىمى.
قاراشا ايىنىڭ قورىتىندىسى بويىنشا قاج جۇيەسىنە قاراستى №10, 12, 14 جانە 57 مەكەمەلەرىندە جالپى سانى 251 جاڭا جۇمىس ورنى قۇرىلدى. قازىرگى ۋاقىتتا وڭىردە وندىرىستىك سەكتوردى كەڭەيتۋ جانە جاڭا جوبالاردى ىسكە قوسۋ جۇمىستارى جالعاسىپ جاتىر.
