اتوم ەلەكتر ستانساسى عانا سەنىمدى ەنەرگيا بەرە الادى. مۇنداي پىكىردى «قازاقستان اتوم ەلەكتر ستانساسى» جشس اتوم ەنەرگەتيكاسى ءبولىمىنىڭ جەتەكشى ينجەنەرى قۇمار اۋسەنوۆ ءبىلدىردى، دەپ حابارلايدى قازاقپارات ءتىلشىسى.
«اتوم ەلەكتر ستانساسىن جوبالاۋمەن اينالىسىپ جاتقانىمىزعا 5 جىل بولدى. مۇنىڭ ءبارى ەلەكتر ەنەرگياسىنىڭ تاپشىلىعىنا بايلانىستى. ءبىز كوپتەگەن جوبانى قاراستىردىق، ولشەمشارتتارىن ازىرلەپ، باعالاۋ جۇرگىزدىك. 2019 جىلى 9 كومپانياعا سۇرانىس جىبەرگەن ەدىك. ولاردىڭ ىشىندە امەريكالىق، رەسەيلىك، كورەيلىك جانە قىتايلىق 5 كومپانيا جاۋاپ بەردى. بۇل 4 ەلدىڭ تەحنولوگياسى شامامەن بىردەي، ۇقساس»، - دەدى قۇمار اۋسەنوۆ ەۋرازيا ۇلتتىق ۋنيۆەرسيتەتىندە اەس-ءتىڭ ەكولوگياعا اسەرىن تالقىلاۋعا ارنالعان دوڭگەلەك ۇستەل وتىرىسىندا.
ونىڭ اتاپ وتۋىنشە، اتالعان ەلدەردىڭ بارلىعىنىڭ تەحنولوگياسى قاۋىپسىز. جالپى، اەس-تەگى اپات 10 ملن جىلدا شامامەن 1 رەت قانا ورىن الۋى مۇممكىن.
«قازىردىڭ وزىندە تاپشىلىق شىرقاۋ شەگىنە جەتكەندە 1 گيگاۆاتقا دەيىن ەنەرگيا تاپشىلىعى بار. اەس قانا بازالىق سەنىمدى ەنەرگيا بەرە الادى. ارينە، جىلۋ ستانساسى دا بار. بىراق، ولار كومىرتەگىن بولەدى»، - دەدى ول.
