سونىمەن قاتار، دەپۋتات بىرقاتار فيرمالاردىڭ اتىن اتاپ، شەتەلگە قارجى تاسۋ ارەكەتتەرىن اشكەرەلەدى. ولاردىڭ دەلدالدىق ارقىلى مول قارجى تاۋىپ، پايداعا كەنەلگەنىن ايتىپ، ناتيجەسىندە قازاقستاندىق مۇنايشىلار مەن قىزمەتكەردىڭ جۇمىسسىز قالاتىنىن حابارلادى. سىرتقا "اقشا تاسۋدىڭ" زاڭدىق سحەماسىن كورسەتىپ، ماسەلەگە مەملەكەتتىك دەڭگەيدە نازار اۋدارۋدى سۇرادى.- قازىر پارلامەنت قابىرعاسىندا دەپۋتاتتار باستاماسىمەن كەزىندە زاڭسىز الىنعان اكتيۆتەردى مەملەكەتكە قايتارۋعا باعىتتالعان حالىقارالىق اسا ماڭىزدى زاڭ جوباسى قارالىپ جاتىر. وسى زاڭ ارقىلى ءبىز وتىز جىل بويى مەملەكەت قازىناسىن توناعان، ەلىمىزدىڭ، حالقىمىزدىڭ بولاشاعىن ۇرلاعان جەمقورلاردى جاۋاپكەرشىلىككە تارتىپ، ولاردىڭ جاسىرعان، شەتەل اسىرعان دۇنيەسىن مەملەكەتكە قايتارۋدى ماقسات تۇتىپ وتىرمىز... قازاقستان بويىنشا بيۋدجەتكە ەڭ كوپ قارجى اۋداراتىن ءوڭىر رەتىندە اتىراۋ ءوڭىرى بولسا، قازاقستانعا قىزمەت ەتىپ جاتقان كومپانيالار ىشىنەن ەڭ كوپ سالىق تولەۋشى رەتىندە "تەڭىزشەۆرويل" كومپانياسى تانىلدى. شەتەل اسقان قارجىمىزدى ىزدەستىرەمىز دەسەك، نازاردى تەڭىز ايلاعىنا اۋدارۋىمىز كەرەك. سوڭعى وتىز جىلدىڭ اينالاسىندا وسىنداي ۇلكەن كومپانيانىڭ اينالاسىندا رەپۋتاتسياسى كۇماندى قازاقستاندىق جانە شەتەلدىك فيرمالار قاپتاپ كەتكەن. ولاردىڭ سانى مىڭداپ سانالادى. ولاردىڭ مىندەتىنە قىزمەت كورسەتۋ، جۇمىس جاساۋ ەمەس، تشو سياقتى الپاۋىت كومپانيالاردان تاپسىرىس الىپ، ونىڭ از بولىگىن قازاقستاندىق كومپانيالارعا ءبولىپ، قالعان ءىرى بولىگىن شەتەلگە زاڭسىز شىعارۋ كىرەدى. ەڭ سوراقىسى سول، وتىز جىل بويى جۇرىسىنەن جاڭىلماعان فيرمالاردىڭ سۇر سحەمالارى ءالى دە جۇمىس جاساپ تۇر - دەدى.
"ادىرنا" ۇلتتىق پورتالى
