«ULYTAU ZHASTARY» باعدارلاماسى اياسىندا 10 جاس مامانعا تۇرعىن ءۇي سەرتيفيكاتتارى تابىستالدى

1564
Adyrna.kz Telegram

بۇگىن جەزقازعاندا «ULYTAU ZHASTARY» باعدارلاماسىنىڭ قاتىسۋشىلارىنا جەڭىلدەتىلگەن نەسيەلەۋ بويىنشا تۇرعىن ءۇي بەرۋگە سەرتيفيكاتتار تابىستالدى. سالتاناتتى شاراعا ءوڭىر باسشىسى ب.ابدىعاليۇلى، «وتباسى بانك» اق وكىلدەرى جانە سەرتيفيكاتقا يە بولعان جاس ماماندار قاتىستى.

ەستەرىڭىزگە سالا كەتەيىك، بيىل ءوڭىرىمىزدىڭ جاستارىنا جەڭىلدەتىلگەن نەسيە بەرۋ تۋرالى شەشىم قابىلدانعان بولاتىن. ۇلىتاۋ وبلىسىنىڭ الەۋمەتتىك-ەكونوميكالىق دامۋىنىڭ كەشەندى جوسپارى اياسىندا وبلىس اكىمدىگى مەن «وتباسى بانك» اق ىسكە اسىراتىن «ULYTAU ZHASTARY» باعدارلاماسىنا وبلىستىق بيۋدجەتتەن 500 ملن تەڭگە بولىنگەن ەدى. «وتباسى بانكى» اق-دا ءوز كەزەگىندە وسى ماقساتتارعا تاعى 250 ملن تەڭگە ءبولدى.

نەسيە جىلدىق 5 پايىز مولشەرلەمەمەن 20 جىلعا دەيىن بەرىلەدى. مىندەتتى شارت-10 پايىزدىق باستاپقى جارنانىڭ بولۋى. جىل سوڭىنا دەيىن وسى باعدارلامانىڭ ارقاسىندا 40-تان استام جاس (مۇعالىمدەر، دارىگەرلەر، جۋرناليستەر، مادەنيەت جانە سپورت، الەۋمەتتىك سالا قىزمەتكەرلەرى، جوو وقىتۋشىلارى مەن عىلىمي قىزمەتكەرلەر) تۇرعىن ۇيمەن قامتاماسىز ەتىلەدى دەپ كۇتىلۋدە.

ايتا كەتەيىك، قازىرگى ۋاقىتتا 29 ادام وزدەرىنىڭ تولەم قابىلەتتىلىگىن راستاپ، نەسيەلىك وتىنىمدەردى ماقۇلدادى.

پىكىرلەر