ايتىسكەر اقىن بالعىنبەك يماش باس ءمۇفتي ناۋرىزباي قاجى تاعانۇلىنىڭ ارۋاقتارعا قاتىستى ايتقان ءپاتۋاسىن قۇپتاماي، قىزمەتىنەن كەتۋىن تالاپ ەتتى، دەپ جازادى "ادىرنا". بۇل تۋرالى ول ءوزىنىڭ الەۋمەتتتىك جەلىدەگى پاراقشاسىندا ءبولىستى.
بۇعان دەيىن جەلىدە "ارۋاق قولداسىن" دەگەن سوزگە قاتىستى باس ءمۇفتيدىڭ ايتقانى پىكىرى ۇلكەن تالقىعا تۇسكەن بولاتىن. بالعىنبەك يماش ءمۇفتيدىڭ ايتقان ەكى ءتۇرلى پىكىرىنە نارازى بولىپ، جاماعاتتان كەشىرىم سۇراسىن دەيدى.
"قازىرگى ءدىني جاعدايلارعا بايلانىستى جاق اشپاۋ كۇنا بولاتىنى انىق. اۋەلدە ەموتسياعا سالىنىپ، ارتىق ايتىپ قويماۋ ءۇشىن ۇندەمەي، ءالىپتىڭ ارتىن باقتىم. بىراق، ءبىزدىڭ قوعام باس ءمۇفتيدىڭ ايىبىن اشىپ ايتۋ بىلاي تۇرسىن، مولدا بىتكەن اقتاپ الەك.
ءدىن تىزگىنىن قولىنا العان ناۋرىزباي تاعانۇلى “ارۋاق قولداسىن” دەگەن تۇسىنىككە قاتىستى از ۋاقىت ىشىندە ەكى ءتۇرلى پىكىر ءبىلدىردى.
اۋەلدە بۇل ءسوز شاريعات شەڭبەرىنە سىيمايتىنىن ايتتى. كەيىن “دىنىمىزدە وعان نەگىز بار، شاريعاتقا قايشى ەمەس” دەدى.
اللانىڭ قاھارىنا ۇشىراتاتىن ءسوز. ويتكەنى، اللانىڭ كەشىرمەيتىن كۇناسى ول - اللاعا سەرىك قوسۋ!
اللامەن قاتار قانداي زاتتان بولسىن جاقسىلىق كۇتۋ، پانا تىلەۋ، جاردەم سۇراۋ - دىننەن شىعاراتىن، ەڭ اۋىر كۇنا! اراق ىشۋدەن دە، زينا جاساۋدان دا، وسىمقورلىقتان دا، كىسى ولتىرۋدەن دە اۋىر!
بۇكىل قمدب يمامدارىنىڭ ءمۇفتيدىڭ ءسوزى مەن ءوزىن اقتاپ، قورعاپ، جانتالاسىپ جاتقانى وتە ۇلكەن قاسىرەت!
ارۋاققا سىيىنۋدى - شاپاعات دەپ، ءولىنىڭ دۇعاسى دەپ، تاۋاسسۋل دەپ، يحسان دەپ ءتۇرلى قيسىنمەن
اقتاپ جاتقانى ءمۋفتيدىڭ سوزىنەن دە جيىركەنىشتى! بۇلار كۇپىردىڭ ەڭ ۇلكەنى اللاعا سەرىك قوسۋدى قولداپ، اقتاپ، قورعاپ جاتىر. مۋفتي ول ءسوزدى ءتۇرلى سەبەپپەن ايتۋى مۇمكىن.
ال ءمۇفتيدىڭ ايتقانىن تۇزەپ، ءتۇرلى قيسىنمەن اقتاپ الەك بولعانداردىڭ ارەكەتىنە قانداي سەبەپ بار؟ نازارباەۆ جامان ەمەس دەگەننىڭ ءبارىن “نۇربوت” دەگەن سياقتى “ارۋاققا سىيىنۋعا بولمايدى” دەگەننىڭ ءبارىن “ۋاحابي” دەپ ءبىر شتامپ سوعا سالاتىن ادەت بار.
مەنىڭ ۇستانىمىم ەشقانداي سالافيلىك-ۋاحابيلىك ۇستانىم ەمەس، اكەمنىڭ ايتىپ كەتكەن وسيەتى. “بالام، ءبىز كوممۋنيست بولدىق. سەندەر تەك اللاعا سىيىنىڭدار. جاراتۋشى جالعىز ءھام كۇشتى! جاراتىلعان كوپ ءھام ءالسىز! كوپ ءارى السىزگە جالبارىنعان جاقسى ما، جالعىز ءارى كۇشتىگە جالبارىنعان جاقسى ما؟ اللا بارىنە قۇدىرەتتى ءارى جەتكىلىكتى. ەگەر ارۋاقتان كومەك سۇراساڭ اللاعا زۇلىمدىق جاساعانىڭ. ونى ءالسىز ءارى جەتكىلىكسىز ساناعانىڭ،” - دەپ وسيەت ايتىپ كەتكەن.
مەن 30 جىل تاربيە العان يمامدارىمنىڭ ىشىندە “ارۋاققا سىيىنۋعا بولادى” دەگەن ءبىر دە ءبىر يمام بولماعان. مەن ەستىگەن حاديس، مەن وقىپ جۇرگەن قۇران تەك تاۋحيدكە شاقىرادى.
مەن يسلام ءدىنىن ۇستانعان قاراپايىم مۇسىلمان رەتىندە باس ءمۋفتيدىڭ ايتقان سوزىنە جاۋاپ بەرۋىن، اللاعا تاۋبە جاساۋىن، جاماعاتتان كەشىرىم سۇراۋىن، جانە ءوز ەركىمەن قىزمەتىنەن كەتۋىن تالاپ ەتەمىن!" دەپ جازدى ول.
ۇقساس جاڭالىقتار
پوسموترەت ەتۋ پۋبليكاتسيۋ ۆ Instagram
"ادىرنا" ۇلتتىق پورتالى
