تەڭ قوعام – تەڭ مۇمكىندىك. انە-مىنە دەگەنشە وسى كۇنگە دە جەتتىك! بۇعان دەيىن جالپىعا ورتاق كەدەرگىسىز ورتا قۇرۋ جايلى تالاي ايتتىق تا، جازدىق تا. شۇكىر، مەملەكەت تاراپىنان مۇمكىندىگى شەكتەۋلى جاندارعا ەداۋىر كوڭىل ءبولىنىپ كەلەدى. كۇنى كەشە اتىراۋدا مۇمكىندىگى شەكتەۋلى بالا تاربيەلەپ وتىرعان اتا-انالار قوعامدىق كولىكتەردە تەگىن قاتىناۋعا مۇمكىندىك الدى. مۇنىڭ ءوزى ۇلكەن قولداۋ. ۇسىنىستى اتا-انالاردىڭ ءوزى بىلدىرگەن ەكەن.
سونداي-اق بارلىق مەملەكەتتىك قىزمەتتەر مۇمكىندىگى شەكتەۋلى جاندار ءۇشىن ونلاين قاراستىرىلعان. سوڭعى وزگەرىس بويىنشا، ەندى مۇمكىندىگى شەكتەۋلى جاندار الەۋمەتتىك تولەم الۋ ءۇشىن ەشقايداي بارىپ، سارسانعا تۇسپەيدى. ارتىق اۋرە بولماي، ءوتىنىشىن ونلاين بىلدىرە الادى. بۇرىن ەڭبەككە جارامسىزدىق جونىندەگى جاردەماقىلاردى الۋ ءۇشىن انىقتامانى قاعاز تۇرىندە ۇسىنۋ كەرەك بولاتىن. قازىر قاعازباستىلىقتان ارىلىپ، بارلىعى قولجەتىمدى بولا ءتۇستى.
ساندارعا سۇيەنسەك، بۇگىنگى تاڭدا ەلىمىزدە 188 مىڭنان استام مۇمكىندىگى شەكتەۋلى بالا بار ەكەن. ولار قوعامنىڭ تەڭ مۇشەسى رەتىندە ءوسۋى ءۇشىن تەڭ ءبىلىم الۋى قاجەت. وقۋ-اعارتۋ مينيسترلىگى دە بۇل ماسەلەلەردىڭ شەشىمىن تاۋىپ قويعان. بيىلدان باستاپ، ينكليۋزيۆتى ءبىلىم بەرۋ اۋقىمى كەڭەيەدى. ەندى ءبىلىم بەرۋ قاجەتتىلىكتەرى بار بالالار ساناتىنا از قامتىلعان، تولىق ەمەس وتباسىدان شىققان بالالار دا جاتقىزىلاتىن بولادى. ءتىپتى الداعى جىلدارى عىلىم جانە جوعارى ءبىلىم مينيسترلىگى مۇمكىندىگى شەكتەۋلى جاندارعا بەرىلەتىن ءبىلىم گرانتتارىنىڭ سانىن ارتتىرۋدى جوسپارلاپ وتىر.
وسى اپتادا ەڭبەك جانە حالىقتى الەۋمەتتىك قورعاۋ مينيسترلىگى «قازاقستاندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندەگى 2025 جىلعا دەيىنگى ۇلتتىق جوسپارىن» قوعام تالقىسىنا شىعارىپ، ءبىر قۋانتىپ تاستادى. وندا ءبىرشاما باستاما كوتەرىلىپ، ءبىراز وڭ ۇسىنىس جازىلعان.
ماسەلەن، مۇمكىندىگى شەكتەۋلى ادامداردىڭ قولى وڭاي جەتە بەرمەيتىن پروتەزدىك قۇرالدارمەن قامتاماسىز ەتۋ، وڭالتۋ ورتالىقتارىن بارىنشا دامىتۋ، تۋا ءبىتتى دەرتتەردى ەرتەرەك انىقتاۋ، ءبىلىم بەرۋدى قاجەت ەتەتىن بالالارعا تۇراقتى قولداۋ كورسەتۋ، مۇمكىندىگى شەكتەۋلى جاندارعا تولەنەتىن الەۋمەتتىك تولەمدى ۇلعايتۋ باستامالارى كوتەرىلگەن.
بۇگىنگى تاڭدا مۇگەدەكتىگى بار ادامداردىڭ الەۋمەتتىك جاعدايىمەن قوسا قۇقىقتىق جاعدايى دا تۇزەلىپ كەلەدى.
ايتالىق، وتكەن جىلى مۇمكىندىگى شەكتەۋلى ازاماتتاردىڭ ەركىن كىرىپ-شىعۋىنا جاعداي ازىرلەمەگەن تۇلعالار 60 ميلليون تەڭگە ايىپپۇل ارقالاعان. 1 062 نىسانعا تەكسەرىس جۇرگىزىلىپ، تالاپقا ساي نە ساي ەمەستىگى قارالعان.
وكىنىشكە وراي، زاڭبۇزۋشىلىقتاردىڭ كوبى تۇركىستان (23 پايىز) وڭىرىنە تيەسىلى، ودان كەيىنگى ورىندا – قوستاناي (22 پايىز), الماتى سوڭىنان (7 پايىز). بىراق جاعداي بۇرىنعىدان الدەقايدا جاقسارعان دەۋگە تولىق نەگىز بار.
الداعى ۋاقىتتا اتالعان ۇلتتىق جوسپار قوعامنىڭ كوڭىلىنەن شىعىپ، قولداۋ تاۋىپ جاتسا، نۇر ۇستىنە نۇر بولار ەدى. بۇل جولعى ۇكىمەتتىڭ مۇمكىندىگى شەكتەۋلى جاندارعا ازىرلەگەن ۇلتتىق جوسپارى قاي جاعىنان بولسىن قۇپ كورەرلىك!
