Teń qoǵam – teń múmkindik. Áne-mine degenshe osy kúnge de jettik! Buǵan deıin jalpyǵa ortaq kedergisiz orta qurý jaıly talaı aıttyq ta, jazdyq ta. Shúkir, memleket tarapynan múmkindigi shekteýli jandarǵa edáýir kóńil bólinip keledi. Kúni keshe Atyraýda múmkindigi shekteýli bala tárbıelep otyrǵan ata-analar qoǵamdyq kólikterde tegin qatynaýǵa múmkindik aldy. Munyń ózi úlken qoldaý. Usynysty ata-analardyń ózi bildirgen eken.
Sondaı-aq barlyq memlekettik qyzmetter múmkindigi shekteýli jandar úshin onlaın qarastyrylǵan. Sońǵy ózgeris boıynsha, endi múmkindigi shekteýli jandar áleýmettik tólem alý úshin eshqaıdaı baryp, sarsanǵa túspeıdi. Artyq áýre bolmaı, ótinishin onlaın bildire alady. Buryn eńbekke jaramsyzdyq jónindegi járdemaqylardy alý úshin anyqtamany qaǵaz túrinde usyný kerek bolatyn. Qazir qaǵazbastylyqtan arylyp, barlyǵy qoljetimdi bola tústi.
Sandarǵa súıensek, búgingi tańda elimizde 188 myńnan astam múmkindigi shekteýli bala bar eken. Olar qoǵamnyń teń múshesi retinde ósýi úshin teń bilim alýy qajet. Oqý-aǵartý mınıstrligi de bul máselelerdiń sheshimin taýyp qoıǵan. Bıyldan bastap, ınklıýzıvti bilim berý aýqymy keńeıedi. Endi bilim berý qajettilikteri bar balalar sanatyna az qamtylǵan, tolyq emes otbasydan shyqqan balalar da jatqyzylatyn bolady. Tipti aldaǵy jyldary Ǵylym jáne joǵary bilim mınıstrligi múmkindigi shekteýli jandarǵa beriletin bilim granttarynyń sanyn arttyrýdy josparlap otyr.
Osy aptada Eńbek jáne halyqty áleýmettik qorǵaý mınıstrligi «Qazaqstanda múgedektigi bar adamdardyń quqyqtaryn qamtamasyz etý jáne turmys sapasyn jaqsartý jónindegi 2025 jylǵa deıingi ulttyq josparyn» qoǵam talqysyna shyǵaryp, bir qýantyp tastady. Onda birshama bastama kóterilip, biraz oń usynys jazylǵan.
Máselen, múmkindigi shekteýli adamdardyń qoly ońaı jete bermeıtin protezdik quraldarmen qamtamasyz etý, ońaltý ortalyqtaryn barynsha damytý, týa bitti dertterdi erterek anyqtaý, bilim berýdi qajet etetin balalarǵa turaqty qoldaý kórsetý, múmkindigi shekteýli jandarǵa tólenetin áleýmettik tólemdi ulǵaıtý bastamalary kóterilgen.
Búgingi tańda múgedektigi bar adamdardyń áleýmettik jaǵdaıymen qosa quqyqtyq jaǵdaıy da túzelip keledi.
Aıtalyq, ótken jyly múmkindigi shekteýli azamattardyń erkin kirip-shyǵýyna jaǵdaı ázirlemegen tulǵalar 60 mıllıon teńge aıyppul arqalaǵan. 1 062 nysanǵa tekseris júrgizilip, talapqa saı ne saı emestigi qaralǵan.
Ókinishke oraı, zańbuzýshylyqtardyń kóbi Túrkistan (23 paıyz) óńirine tıesili, odan keıingi orynda – Qostanaı (22 paıyz), Almaty sońynan (7 paıyz). Biraq jaǵdaı burynǵydan áldeqaıda jaqsarǵan deýge tolyq negiz bar.
Aldaǵy ýaqytta atalǵan ulttyq jospar qoǵamnyń kóńilinen shyǵyp, qoldaý taýyp jatsa, nur ústine nur bolar edi. Bul jolǵy Úkimettiń múmkindigi shekteýli jandarǵa ázirlegen ulttyq jospary qaı jaǵynan bolsyn qup kórerlik!
