ەكس-پرەزيدەنت نۇرسۇلتان نازارباەۆ اباي وبلىسىنداعى ءورت سالدارىنان قازا تاپقان ادامداردىڭ وتباسىنا كوڭىل ايتتى، دەپ حابارلايدى "ادىرنا" نازارباەۆتىڭ رەسمي سايتىنا سىلتەپ.
وندا "اباي وبلىسىنداعى اۋقىمدى ءورت سالدارىنان ورمان شارۋاشىلىعىنىڭ بىرقاتار جۇمىسشىلارىنىڭ قايعىلى قازاعا ۇشىراعانى تۋرالى حاباردى زور كۇيزەلىسپەن قابىلدادىم" دەلىنگەن 11 ماۋسىمدا جاريالانعان حابارلامادا.
"قازا بولعانداردىڭ تۋىستارى مەن جاقىندارىنا كوڭىل ايتامىن، زارداپ شەككەندەردىڭ تەز ارادا ساۋىعىپ كەتۋىن تىلەيمىن. قولعا الىنىپ جاتقان شارالار ارقىلى بۇل اپات ەڭسەرىلەدى دەپ سەنەمىن",- دەپ تىلەگىن بىلدىرگەن نۇرسۇلتان نازارباەۆ.
بۇعان دەيىن ءورت ايماعىندا 14 ادام قازا تاپقان. تاعى ءبىر ادامنىڭ حابار-وشارسىز كەتكەنى حابارلانعان.
ەسكە سالايىق، سوڭعى مالىمەتتەر بويىنشا، توتەنشە جاعداي جاريالانعان اباي وبلىسىنداعى ورمان ءورتىنىڭ اۋماعى 60 مىڭ گەكتاردى قۇراپ، تۇرعىندار بىرنەشە ەلدى مەكەننەن كوشىرىلدى. ورتتەن شىققان ءتۇتىن جەتىسۋ ءوڭىرىن باسىپ ۇلگەردى.
وقيعالاردان سوڭ يۋري يلين توتەنشە جاعدايلار ءمينيسترى قىزمەتىنەن بوساتىلدى. ونىڭ ورنىنا سىرىم ءشارىپحانوۆ تاعايىندالدى. اباي وبلىسىنىڭ اكىمى نۇرلان ۇرانحاەۆقا سوگىس جاريالاندى. ورتكە بايلانىستى قىلمىستىق ءىس قوزعالىپ، ونى ارنايى پروكۋرورلار تەرگەپ جاتىر.
11 ماۋسىمدا پرەزيدەنت قاسىم-جومارت توقاەۆ قايتىس بولعان 14 ادامنىڭ بارلىعىن «قۇرمەت» وردەنىمەن ماراپاتتادى. 12 ماۋسىم قازاقستاندا جالپىۇلتتىق ازا تۇتۋ كۇنى بولىپ جاريالاندى.
ۇقساس جاڭالىقتار
