ماۋلەن اشىمباەۆ سەناتتىڭ جالپى وتىرىسىندا پرەمەر-ءمينيستردىڭ ورىنباسارى – قارجى مينيستر ەرۇلان جاماۋباەۆ پەن توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆقا تج سالاسىنا كۇردەلى رەفورما جۇرگىزۋ كەرەگىن ايتتى، دەپ حابارلايدى “ادىرنا” ۇلتتىق پورتالى.
ەرۇلان كەنجەبەكۇلى، يبراگيم داۋكەسۇلى، اباي وبلىسىنداعى ءورت توتەنشە جاعداي كەزىندە ارەكەت ەتۋ جۇيەسىنىڭ قانشالىقتى ءتيىمسىز ەكەنىن انىق كورسەتتى. بۇل – اقيقات. مۇنىمەن داۋلاسۋدىڭ دا كەرەگى جوق. تاريحىمىزدا ءبىرىنشى رەت وسىنداي (الاپات) ورتپەن كۇرەسىپ جاتساق، ول تۇسىنىكتى بولار ەدى. بىراق جىل سايىن وسىنداي جاعداي بولادى. بىلتىر كۇزدە قوستاناي وبلىسىندا ۇلكەن ءورت بولدى. 40 مىڭنان اسا گەكتار ورمان، جەر ورتەنىپ كەتتى، - دەدى ماۋلەن اشىمباەۆ.سەنات سپيكەرى قۇرىلىمدار اراسىندا ءوزارا ۇيلەسىمنىڭ جوقتىعىن ايتتى.
سىزدەر پرەزيدەنت تاپسىرماسىن ورىنداپ جاتىرمىز دەپ اقپارات تا بەردىڭىزدەر. بىراق اباي وبلىسىنداعى جاعداي وسى بۇكىل جۇيەنىڭ ۋاقىتىلى ارەكەت ەتپەگەنىن، قۇرىلىمدار اراسىندا ۇيلەسىمنىڭ، ءتارتىپتىڭ جوق ەكەنىن انىق كورسەتتى. وسىعان بايلانىستى وسى سالانى تۇبەگەيلى وزگەرتەتىن، دۇرىستايتىن ۋاقىت كەلدى دەپ ەسەپتەيمىز. پرەزيدەنتتىڭ ءتيىستى تاپسىرمالارى بار. ارىپتەستەرىمىز باعدارلاما قابىلدانادى دەپ بايانداما جاساپ جاتىر. باسقا دا شارالار قابىلدانادى. تەرگەۋ جۇمىستارى ءجۇرىپ جاتىر. ونىڭ قورىتىندىسى بويىنشا ءبىراز ءىس-شارالار جۇيەگە اساتىنى ءسوزسىز، - دەدى سەنات توراعاسى.سونداي-اق، ول توتەنشە جاعداي سالاسىنا قوماقتى قارجى بولىنەتىنىن دە اتاپ ءوتتى.
قازىر بيۋدجەتتى قاراپ جاتىرمىز. الداعى ۋاقىتتا بارلىق ۇسىنىستى قولداپ، توتەنشە جاعداي كەزىندە ارەكەت ەتەتىن بارلىق قۇرىلىمدى قارجىلاندىرۋ ءۇشىن كەلەسى جىلدىڭ بيۋدجەتىنە ءبىراز قارجى ەنگىزەمىز. ول – جۇزدەگەن ملرد دوللار. ءبارىمىز ولاردىڭ دۇرىس پايدالانۋىن، ولاردىڭ ماقساتتى تۇردە جۇمسالۋىن، ناتيجەسى بولۋىن قامتاماسىز ەتۋىمىز كەرەك، - دەپ قورىتىندىلادى ماۋلەن اشىمباەۆ.
ۇقساس جاڭالىقتار
