شىمكەنتتە جىل سايىن 2 ميلليون شارشى مەتر تۇرعىن ءۇي سالىناتىن بولدى

شىمكەنتتە سوڭعى بەس جىلدا 3 ملن. 700 مىڭ شارشى مەترگە جۋىق تۇرعىن ءۇي سالىنعان جانە ونىڭ 2 ميلليونى سوڭعى ەكى جىلدا بەرىلدى. -ەندىگى كەزەكتەگى مەجەمىز - جىل سايىنعى تۇرعىن ءۇي كولەمىن 2 ملن. شارشى مەترگە جەتكىزۋ. ول ءۇشىن قۇرىلىس الاڭىن ءبىرىنشى كەزەكتە ينفراقۇرىلىممەن دەر كەزىندە قامتۋىمىز قاجەت، - دەدى قالا اكىمى مۇرات دۇيسەنبەكۇلى استانا قالاسىندا وتكەن قر پرەزيدەنتى جانىنداعى ورتالىق كوممۋنيكاتسيالار قىزمەتىنىنىڭ ءباسپاسوز بريفينگىندە. بۇگىندە تۇرعىن ءۇي كەشەنىن تۇرعىزۋ ماقساتىندا قۇرىلىس اۋماقتارى ايقىندالىپ، ينجەنەرلىك جۇيەلەردى جوبالاۋ جۇمىستارى باستالدى. بيىل مەملەكەتتىك باعدارلاما شەڭبەرىندە 4 445 وتباسى باسپانامەن قامتىلادى. الايدا مەملەكەتتىك باعدارلامادان تىس قالىپ وتىرعان الەۋمەتتىك ساناتتاعى ازاماتتار دا بار. اتالعان ساناتتاعى ازاماتتاردى تۇرعىن ۇيمەن قامتۋ ءۇشىن «قامقور» جەرگىلىكتى تۇرعىن ءۇي باعدارلاماسى قابىلداندى. ايتا كەتەيىك، باعدارلامانىڭ بيىلعى كونكۋرسىنا 150 ليميت بولىنگەن، ماسەلەن مۇنداعى «قامقور» باعدارلاماسىنىڭ شارتىنا سايكەس قاتىسۋشى ازامات 20 ميلليون تەڭگەگە دەيىن 5 پايىزدىق جەڭىلدەتىلگەن نەسيەمەن باسپانالى بولا الادى. باعدارلامانى جۇزەگە اسىرۋعا 3 ملرد. تەڭگە ءبولىندى.