الەۋمەتتىك جەلىدە وسى ىسكە بايلانىستى ءار ءتۇرلى پىكىر ايتىلدى. ازاماتتاردىڭ ءبىر بولىگى «ارلان»جاساعىنىڭ ىسىنە ءتانتى بولسا، ەكىنشى تاراپ مۇنى قويىلىم دەپ باعالادى. شىن مانىندە كاسپي بانك عيماراتىنداعى بۇل وقيعا قويىلىم با، جوق الدە شىن با? وسى جانە وزگە دە سۇراقتاردى ىشكى ىستەر ءمينيسترى مارات احمەتجانوۆتىڭ وزىنە قويدىق.
– كاسپي بانكتەگى وقيعاعا بايلانىستى مينيسترلىكتىڭ ءباسپاسوز قىزمەتىنەن بۇرىن تەلەگرامدا اقپارات تاراتىلدى. بۇعان بايلانىستى تەكسەرىس جۇرگىزەسىز بە؟
– ارنايى وپەراتسياعا ىشكى ىستەر مينيسترلىگىنەن باسقا دا ورگاندار قاتىستى. ناقتىراق ايتسام,پروكۋراتۋرا مەن ۇلتتىق قاۋىپسىزدىك كوميتەتى جانە اكىمشىلىكتىڭ ادامدارى بولدى. ەگەر قانداي دا ءبىر اقپارات شىققان بولسا، قىزمەتتىك تەكسەرىس جۇرگىزىلەتىن بولادى.
– مينيستر مىرزانىڭ ءوزىنىڭ كەلىسسوز جۇرگىزۋىڭىزگە نە سەبەپ بولدى؟
– مەن قازىر سىزدەرگە ءمان-جايدى تولىق ايتا المايمىن دەپ وتىرمىن عوي. ويتكەنى تەرگەۋ ءجۇرىپ جاتىر. كەزدەسۋىن كەزدەستىم, ەندى شاقىرىپ...
– ءسىزدى شاقىردى ما؟
– جوق، الدىن-الا ءوزىم تەلەفونمەن سويلەستىم. سوسىن كىرىپ كەپىلدىككە العان ازاماتشانى بوساتۋدى سۇرادىم. ويتكەنى ول اپاسىمەن سويلەستى. وعان كونبەگەن سوڭ ارنايى جاساقتاردىڭ جۇمىسى باستالدى.
– قوعامدا كەشەگى ىسكە بايلانىستى «قويىلىم» دەپ سەنبەۋشىلىك بار. بۇل شىنىندا قويىلىم با؟
– ونداي اڭگىمە جوق. ول وتىرىك جالعان اڭگىمە. ويتكەنى ءيميدجدى ونداي «قويىلىمدار» ەمەس، باسقا جۇمىستار كوتەرەدى.
– ءسىزدىڭ كەلىسسوز جۇرگىزۋىڭىزگە نە سەبەپ بولدى؟ ىشكى ىستەر مينيسترلىگىندە سىزدەن باسقا ادام جوق پا؟
– كەلىسسوزدە مەنەن دە باسقا ادامدار بولدى عوي. مەنىڭ ورىنباسارلارىم بولدى. كەلىسسوز جۇرگىزگەن ادامدار بولدى ىشىندە.
– ءوزىڭىزدى كەپىلدىككە الادى دەپ ويلاعان جوقسىز با؟
– جوق ءوزىم ايتتىم، كەپىلگە العان ادامدى بوساتىپ,ءوزىم قالايىن دەپ. بىراق وعان كونبەدى.
– ۇستىڭىزدە برونەجيلەت بولدى ما؟
– ول برونەجيلەتپەن كىرگىزبەدى.
– كۇدىكتىنىڭ قانداي تالابى بولدى؟
– ونىڭ تالابى ءار ءتۇرلى بولدى. قازىر مەن بارلىق اقپاراتتى ايتا المايمىن. ويتكەنى قازىر تەرگەۋ جۇمىستارى ءجۇرىپ جاتىر.
– كۇدىكتى بۇعان دەيىن قانداي باپتارمەن سوتتالعان؟
– بىرەۋى – ۇرلىق، بىرەۋى الاياقتىق.
– عيماراتقا ەكى ساعاتقا جەتەر جەتپەس ۋاقىتتا باسىپ كىردىڭىزدەر. بۇل از ۋاقىت ەمەس پە؟ نەگە قاتەرگە باس تىكتىڭىزدەر؟ كەپىلدەگى ادامداردىاتىپ تاستاۋى مۇمكىن ەدى عوي?
– ونىمەن كەلىسسوز جۇرگىزدى عوي. عيماراتتا كەپىلگە الىنعان ءبىزدىڭ ازاماتتار بولعاسىن ولاردىڭ دا قاۋىپسىزدىگىن جان-جاقتى قاراۋ كەرەك قوي. مەن ەندى بۇكىل قۇپيانى اشپاي-اق قويايىن. قازىر تەرگەۋ ءجۇرىپ جاتىر، تەرگەۋ اياقتالعان كەزدە نەمەسە پروكۋروردىڭ رۇقساتىمەن كەلەسى مالىمەتتەردى الاسىزدار.
– ەكى ساعاتتا عيماراتقا باسىپ كىرۋ قانشالىقتى دۇرىس بولدى. بىرەۋ قازا تاپقان جاعدايدا سىزدەردىڭ قىزمەتتەرىڭىزگە سىن بولماس پا ەدى؟
– مۇنى تەرگەۋ بارىسى انىقتايدى. دۇرىس بولدى، بۇرىس بولدى ما دەگەن سۇراقتى تەكسەرىپ، شەشىم قابىلدايدى.
– ءسىزدى ەشكىم شاقىرماسا دا ونىمەن كەزدەسۋگە نەگە باردىڭىز؟
– مەن ونىمەن تەلەفونمەن ءسويلەستىم. ءوز ەركىمەن بەرىلەتىن بولسا (جازاسىن جەڭىلدەتۋگە كەپىلدىك بەرەيىن دەپ باردىم). ويتكەنى 261 باپتا «ەگەر كەپىلدىككە العان ازاماتتاردى ءوز ەركىمەن بوساتاتىن بولسا، ول قىلمىستىق جاۋاپكەرشىلىكتەن بوساتۋى دا مۇمكىن» دەگەن قوسىمشا جازىلعان. سونىڭ ءبارىن ءتۇسىندىرىپ، اشۋىن باسۋعا تىرىستىم. ءبىزدىڭ قولدانعان قۇرالداردىڭ ەشقانداي قاۋىپى جوق. ول تەك قىلمىسكەردىڭ كوڭىلىن اۋدارۋ ءۇشىن جاسالعان. جالپى 10-12 سەكۋندتىڭ ىشىندە بۇكىل وپەراتسيا ءبىتتى.
سەرىك جولداسباي
«ادىرنا» ۇلتتىق پورتالى
