«قازمۇنايگازدىڭ» ەنشىلەس كاسىپورنى پاۆلودار مۇناي-حيميا زاۋىتى (پمحز) 20 ماۋسىم مەن 19 شىلدە ارالىعىندا جوسپارلى جوندەۋ جۇمىستارىنا بايلانىستى جۇمىسىن توقتاتتى. بۇل تۋرالى زاۋىت مالىمدەدى، دەپ حابارلايدى “ادىرنا” ۇلتتىق پورتالى.
پمحز ونەركاسىپتىك قاۋىپسىزدىكتى قامتاماسىز ەتۋ سالاسىنداعى زاڭناما تالاپتارىنا سايكەس «پاۆلودار مۇناي-حيميا زاۋىتى» جشس-دە جوسپارلى كۇردەلى جوندەۋدىڭ باستالعانى تۋرالى حابارلايدى. جۇمىس كەستەسىن قازاقستان رەسپۋبليكاسى ەنەرگەتيكا مينيسترلىگى بەكىتتى جانە 2023 جىلعى 20 ماۋسىم مەن 19 شىلدە ارالىعىندا پاۆلودار مۇناي-حيميا زاۋىتى جۇمىسىن ۋاقىتشا توقتاتادى، دەلىنگەن حابارلامادا.سونداي-اق، جوسپارلى كۇردەلى جوندەۋ كەزىندە تەحنولوگيالىق جابدىقتار، ياعني قۇبىرلار، پەشتەر، بۋ قۇبىرلارى جانە باسقا دا جابدىقتار تەحنيكالىق اتتەستاتتاۋ، جوندەۋ جانە ونەركاسىپتىك قاۋىپسىزدىكتى تەكسەرۋدەن وتەدى. زاۋىتتىڭ توقتاۋىنا بايلانىستى بەنزين جانە ديزەل وتىنىنىڭ 37 مىڭ جانە 47 مىڭ توننا قورى جيناقتالعانى حابارلاندى. بۇل قور زاۋىتتى جوندەۋ كەزىندە جانارمايدىڭ ۋاقتىلى جەتكىزىلىپ وتىرۋىنا جاعداي جاسايدى.
