اقتوبەدە ەسىرتكى تاراتۋمەن اينالىسقان ەرلى-زايىپتى 11 جىلعا سوتتالدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«وتكەن جىلدىڭ سوڭىندا اقتوبە وبلىسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ارنايى جاساقپەن بىرلەسىپ ماقساتتى جەدەل-ىزدەستىرۋ شارالارىن جۇرگىزۋ بارىسىندا اقتوبە قالاسىندا 27 جاستاعى ايەل مەن 40 جاستاعى ەر ازاماتتى ۇستادى. مەديتسينالىق كۋالاندىرۋ قورىتىندىسىنا سايكەس، ەرلى-زايىپتىلاردىڭ ەكەۋى دە ەسىرتكىلىك ماس كۇيدە بولعان. ولاردى جەكە ءتىنتۋ، تۇرعىلىقتى جەرىن جانە ەسىرتكى قويعان جەرلەرىن ءتىنتۋ بارىسىندا جالپى سالماعى 1,5 كەلىنى قۇرايتىن سينتەتيكالىق پسيحوتروپتىق زاتتار تاركىلەندى»،—دەلىنگەن حابارلامادا.بۇل دەرەكتەر بويىنشا قىلمىستىق كودەكستىڭ 297-بابىنىڭ 3-بولىگى بويىنشا قىلمىستىق ءىس قوزعالدى. 2023 جىلدىڭ مامىر ايىندا اقتوبە قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ شەشىمىمەن ەرلى-زايىپتىلار ساتۋ ماقساتىندا اسا ءىرى كولەمدە پسيحوتروپتىق زاتتاردى ساقتاعانى مەن تاسىمالداعانى ءۇشىن كىنالى دەپ تانىلىپ، 11 جىلعا باس بوستاندىعىنان ايىرىلدى.
