2 اقپان – ۇلتتىق باسىلىم كۇنى بولىپ بەكىتىلدى. بۇل تۋرالى اقپارات جانە قوعامدىق دامۋ ءمينيسترى دارحان قىدىرالى مالىمدەدى، دەپ حابارلايدى “ادىرنا” ۇلتتىق پورتالى.
جاعىمدى جاڭالىعىمىز بار. 2 اقپان – ۇلتتىق باسىلىم كۇنى بولىپ بەكىتىلدى. باستاۋىندا احمەت بايتۇرسىنۇلى، ءاليحان بوكەيحانۇلى، مىرجاقىپ دۋلاتۇلى سەكىلدى ۇلت زيالىلارى تۇرعان «قازاق» گازەتىنىڭ العاشقى ءنومىرى وسىدان 110 جىل بۇرىن، 2 اقپان كۇنى جارىق كورگەنى بەلگىلى. الاش ارداقتىلارىنىڭ قولتاڭباسى قالعان گازەت ۇلتتىق رەنەسسانستىڭ قاينار كوزىنە اينالىپ، حالقىمىزدىڭ اقىل-ويىن، سانا-سەزىمىن بولەك ارناعا بۇردى، - دەپ جازدى مينيستر الەۋمەتتىك جەلىدەگى پاراقشاسىنا.مينيستر مەملەكەت باسشىسىنىڭ بۇعان دەيىن قازاق راديوسىنىڭ 100 جىلدىعى اياسىندا 1 قازاندى راديو قىزمەتكەرلەرى كۇنى دەپ رەسمي تۇردە بەكىتكەنىن ەسكە سالدى.
ەندى مىنە، جۋرناليستەر قاۋىمى ءۇشىن تاعى ءبىر اتاۋلى كۇن بەلگىلەنىپ وتىر. ءباسپاسوز سالاسىندا ەسەلى ەڭبەك ەتىپ، قالام تەربەپ جۇرگەن بارشا ارىپتەستەرىمىزدى ۇلتتىق ءباسپاسوز كۇنىنىڭ بەلگىلەنۋىمەن قۇتتىقتايمىن! - دەيدى ول.
