جەزقازعاندا مەتاللۋرگتەردىڭ مەرەيىن ۇستەم ەتكەن مەرەكە ءوتتى

1533
Adyrna.kz Telegram

مىس الىبى رەتىندە الەمگە داڭقى شىققان «قازاقمىس» كومپانياسى تاۋ-كەن، بايىتۋ جانە مەتاللۋرگيا سالاسى ماماندارىنىڭ كاسىبي مەرەكەسىن اتاپ ءوتۋدى داستۇرگە اينالدىرعان. جەر قويناۋىنداعى ەن بايلىقتى ەل يگىلىگىنە جاراتىپ جۇرگەن مەتاللۋرگتەردىڭ ءتول مەرەكەسى بيىل دا جەزقازعان، بالقاش قالالارىن دۇبىرگە بولەدى، دەپ حابارلايدى "ادىرنا" ۇلتتىق پورتالى kznews.kz-كە سىلتەمە كورسەتە وتىرىپ.

ۇلىتاۋ وبلىسى جەزقازعان شاھارىنداعى مەرەيلى ماماندىق يەلەرىنىڭ تويىن اتاپ ءوتۋ ماقساتىندا «قازاقمىس سمەلتينگ» جشس مادەني شارالاردى ۇيىمداستىرىپ، قالا حالقىنا مەرەكەلىك كوڭىل-كۇي سىيلادى.

ەڭبەك وزاتتارى ماراپاتتالدى. ال باستى شارا رەتىندە قالانىڭ باستى الاشاحان داڭعىلىندا قازاقستاندىق ونەر جۇلدىزدارىنىڭ قاتىسۋىمەن وتكەن گالا كونتسەرتتى ايتۋعا بولادى.

14 شىلدە كۇنى كەشقۇرىم داڭعىل بويىنا جينالعان حالىقتىڭ قاتارى قالىڭ بولدى. ساحنا تورىنە اۋەلى جەرگىلىكتى ونەرپازدار كوتەرىلىپ، جينالعانداردى انمەن، بيمەن سەرپىلتتى. بۇگىنگى تاڭدا ەلىمىزگە تانىمال ءانشى ادىلەت جاۋعاشار،  ميراس جۇگىنىس، Turan KR,  مەحوۆايا 8/1, لۋينا سىندى ەسترادانىڭ وكىلدەرى جەزقازعاننىڭ اسپانىن اسەم انمەن كومكەردى.

كەشتى ۇلتتىق ءتىلىمىزدى ناسيحاتتاپ جۇرگەن تانيا تۋرلاي مەن رەسپۋبليكاعا تانىمال تەلەجۇرگىزۋشى قازبەك قاسىم جۇرگىزدى.

ءتورت مىڭ جىلدىق تاريحى بار مەتاللۋرگيا سالاسىنىڭ بۇگىنگى مۇراگەرى رەتىندە تانىلعان جەزقازعان، بالقاش قالالارىنداعى مەتاللۋرگتەردىڭ ۇشان-تەڭىز ەڭبەگىنىڭ ارقاسىندا ەلىمىز دامىپ، ايماقتاردىڭ تىنىس-تىرشىلىگىنە قۋات بەرىپ وتىر. قازاقمىس سىندى الىپتىڭ ەڭبەك ادامىنا دەگەن قۇرمەتى وسىلايشا ءبىر ايقىن كورىنىسپەن دالەلدەندى.

بەس كۇن مىستى شاھاردى دۇبىرگە بولەگەن توي گالا كونتسەرتتەن سوڭ وتشاشۋمەن تۇيىندەلدى.

"ادىرنا" ۇلتتىق پورتالى

پىكىرلەر