Mys alyby retinde álemge dańqy shyqqan «Qazaqmys» kompanııasy taý-ken, baıytý jáne metallýrgııa salasy mamandarynyń kásibı merekesin atap ótýdi dástúrge aınaldyrǵan. Jer qoınaýyndaǵy en baılyqty el ıgiligine jaratyp júrgen metallýrgterdiń tól merekesi bıyl da Jezqazǵan, Balqash qalalaryn dúbirge bóledi, dep habarlaıdy "Adyrna" ulttyq portaly kznews.kz-ke silteme kórsete otyryp.
Ulytaý oblysy Jezqazǵan shaharyndaǵy mereıli mamandyq ıeleriniń toıyn atap ótý maqsatynda «Qazaqmys Smeltıng» JShS mádenı sharalardy uıymdastyryp, qala halqyna merekelik kóńil-kúı syılady.
Eńbek ozattary marapattaldy. Al basty shara retinde qalanyń basty Alashahan dańǵylynda qazaqstandyq óner juldyzdarynyń qatysýymen ótken gala konertti aıtýǵa bolady.
14 shilde kúni keshqurym dańǵyl boıyna jınalǵan halyqtyń qatary qalyń boldy. Sahna tórine áýeli jergilikti ónerpazdar kóterilip, jınalǵandardy ánmen, bımen serpiltti. Búgingi tańda elimizge tanymal ánshi Ádilet Jaýǵashar, Mıras Júginis, Turan KR, Mehovaıa 8/1, Lýına syndy estradanyń ókilderi Jezqazǵannyń aspanyn ásem ánmen kómkerdi.
Keshti ulttyq tilimizdi nasıhattap júrgen Tanıa Týrlaı men respýblıkaǵa tanymal telejúrgizýshi Qazbek Qasym júrgizdi.
Tórt myń jyldyq tarıhy bar metallýrgııa salasynyń búgingi murageri retinde tanylǵan Jezqazǵan, Balqash qalalaryndaǵy metallýrgterdiń ushan-teńiz eńbeginiń arqasynda elimiz damyp, aımaqtardyń tynys-tirshiligine qýat berip otyr. Qazaqmys syndy alyptyń eńbek adamyna degen qurmeti osylaısha bir aıqyn kórinispen dáleldendi.
Bes kún mysty shahardy dúbirge bólegen toı gala konertten soń otshashýmen túıindeldi.
"Adyrna" ulttyq portaly
